İshki ister mınıstrligi esirtki qylmysyna qarsy is-qımyl komıtetiniń basshysy Danıar Meıirhanǵa qatysty tekserý jumystaryn bastaǵany belgili boldy.Bul týraly bloger Dastan Qabylbekov áleýmettik jelidegi paraqshasynda málimdedi, dep habarlaıdy Dalanews.kz.

Onyń málimetinshe, birneshe qyzmetker komıtet basshysynyń ústinen aryz túsirgen.

"Meıirhan qyzmettik ókilettigin asyra paıdalandy degen kúdikke ilinýi múmkin. Sondaı-aq ol qyzmetker áıelge tıisý deregi boıynsha da tekserilip jatqany bolýy múmkin", - dedi Qabylbekov.

Atalǵan jaıtqa baılanysty İshki ister mınıstrligi resmı túsinikteme berdi. Vedomstvonyń habarlaýynsha, qoldanystaǵy zańnamaǵa sáıkes árbir ótinish mindetti túrde tirkelip, jan-jaqty qaralady. Qazirgi ýaqytta oqıǵanyń barlyq mán-jaıyn obektıvti anyqtaý úshin tekserý is-sharalary júrgizilip jatyr. Tergeý múddesine baılanysty ózge aqparat jarıa etilmeıdi.