Astanadaǵy Esil ózeninde muzdyń jyldam erýi baiqalady. Onyń qalyńdyǵy qazirgi ýaqytta – 43 sm, biraq ol jyldam juqarady. Elordalyq Tótenshe jaǵdailar departamenti turǵyndarǵa qaýipsizdik erejelerin eske salyp, úndeý jasady, dep habarlaidy Dalanews.kz qala ákimdiginiń resmi saityna silteme jasap.
Sý aidyndarynda qaiǵyly oqiǵalar men adamdardyń jaraqattanýynyń aldyn alý maqsatynda elordalyq qutqarýshylar kún saiyn reidter júrgizedi.
Astana qalasynyń Tótenshe jaǵdailar departamenti muzdyń erý kezeńinde qarapaiym qaýipsizdik erejelerin saqtaýdyń mańyzdylyǵyn eske saldy:
- Muzdyń juqa oryndaryna shyqpańyz;
- Túnde jáne qolaisyz aýa raiy jaǵdaiynda muzǵa shyǵýǵa bolmaidy;
- Muzdyń beriktigin teýip nemese ústine sekirý arqyly synamańyz;
- Ruqsat etilmegen oryndardaǵy muzdy jerlerden ótpeńiz;
- Muzdyń ústinde ot jaǵýǵa bolmaidy;
- Muzda balyq aýlaý kezinde janyńyzda eki tesikten artyq burǵylaýǵa bolmaidy;
- Tótenshe jaǵdailarda evakýatsiialaýǵa kedergi keltirýi múmkin jeke zattardy nemese basqa zattardy muzda qaldyrmańyz;
- Qaýip tóngen jaǵdaida tez arada kómekke qońyraý shalý úshin ózińizben birge bailanys quraldary bolýy kerek;
- Muzdyń beriktigine kúmánińiz bolsa, ústine shyqpaǵanyńyz abzal.
Bir adam úshin muzdyń qaýipsiz qalyńdyǵy keminde 10 santimetr bolýy kerek.
