Qarjyger Kúnekei Nurlan Janar Baisemizge bergen suhbatynda ǵylymi dissertatsiiasy aiasynda Qazaqstandaǵy keibir blogerlerdiń eldi qymbat zattardy nesiege alyp aldaýy týraly zertteý júrgizgenin aitty. Ol bul áreketterdiń qoǵamǵa ziiandy ekenin naqty mysaldarmen keltirip otyr, dep habarlaidy Dalanews.kz.
Qarjygerdiń aitýynsha, halyqtyń ishki qarjylyq turaqsyzdyǵy men senimsizdigi – jalǵan ómir saltyn kórsetetin blogerler, ártister men infobiznesmenderdiń kóbeiýine sebep bolyp otyr.
«Qazir adamdardyń ishki turaqsyzdyǵynan haip qýǵandar kóbeidi. Olar jurtty áserleý úshin óz ómirlerin ádeii ádemilep kórsetedi. Men óz blogymda “blogerler sizdiń qarjylyq sheshimderińizge áser ete me?” degen saýalnama júrgizdim. Respondentterdiń 60%-y “iá, kádimgidei áser etedi” dep jaýap berdi. Al meniń aýditoriiam – oilanatyn aýditoriia», – deidi Kúnekei.
Qarjyger dissertatsiiasy aiasynda blogerlerdiń qymbat taýarlardy jalǵa alyp, jalǵan ómir saltyn kórsetetini týraly naqty derekterdi jinaǵanyn aitty.
«Jyldam baiyp ketý, biznes-klass ushaqpen ushý, brend kiim kiiý — bári de áser etýdiń mysaly. Mysaly, malshy adam biznes-klasspen ushpas buryn “maǵan shynymen bul bilet kerek pe?” dep oilanýy kerek. Muǵalim Gucci aiaq kiimin alǵysy kelse, aldymen “bul týfli meniń ómirimdi jaqsarta ma?” dep ózine suraq qoisyn. Al blogerler “Esentai Mall-ǵa” baryp, halyqtyń nazaryn aýdarý úshin nesiege qymbat kiimder alyp, avtosalondardan kólikter men qyzyl bantikterdi jalǵa alady. Bul — men zerttegen naqty derekter», — deidi ol.
Kúnekeidiń aitýynsha, qarjylyq turaqtylyqqa keminde 3–4 jyl qajyrly eńbekpen ǵana jetýge bolady. Al keibir blogerler «men siiaqty bai bolǵyń kelse, 9 myń teńgege kýrsyma jazyl» dep jalǵan ýádelermen jurtty adastyrady.
«Cartier-diń áshekeiin bólip tóleýge alý – bul shekten shyqqandyq. Bul halyqqa ótirik aityp, olardyń senimin paidalaný. Shyn máninde, adam ishki turaqtylyqqa ie bolmasa, syrtqy faktorlardyń yqpalymen durys sheshim qabyldai almaidy», – deidi Kúnekei Nurlan.
