Qazaqstanda 5 maýsymnan bastap Biryńǵai jinaqtaýshy zeinetaqy qoryndaǵy (BJZQ) jetkilikti shekti esepteý tártibi ózgeredi. Jinaǵynda jetkilikti shekten artyq qarajaty bar azamattar onyń bir bóligin turǵyn úi jaǵdaiyn jaqsartýǵa nemese emdelýge paidalanýǵa ótinish bere alady, dep habarlaidy dalanews.kz.
Buǵan deiin premer-ministr Oljas Bektenov zeinetaqy jinaǵynyń jetkilikti shegin esepteý ádistemesin ózgertý týraly qaýlyǵa qol qoidy.
Jetkilikti shek - bolashaqtaǵy zeinetaqy tólemin qamtamasyz etý úshin azamattyń shotynda mindetti túrde qalýǵa tiis soma. Al osy mólsherden asatyn qarajatty turǵyn úi satyp alýǵa, ipotekany óteýge nemese emdelýge jumsaýǵa bolady.
Jańa ádisteme boiynsha esepteý kezinde azamattyń jasy, ómir súrý uzaqtyǵy, eń tómengi zeinetaqy mólsheri, bolashaq jarnalar, investitsiialyq tabys jáne basqa da kórsetkishter eskeriledi.
Mamandardyń sózinshe, memleket ár adam zeinetke shyqqannan keiin qansha qarajat qajet etetinin eseptep, shotta saqtalýǵa tiis somany soǵan qarai anyqtaidy.
Jetkilikti shekti esepteý kezinde:
- azamattyń jasy;
- zeinetke shyǵýǵa deiingi jyldar sany;
- eń tómengi zeinetaqy kólemi;
- bolashaqtaǵy zeinetaqy jarnalary;
- investitsiialyq tabys;
- tólemder men ózge kórsetkishterdiń jyl saiynǵy ósimi nazarǵa alynady.
Otbasy banktiń málimetinshe, 4 maýsymnan keiin berilgen ótinishter jańa ereje boiynsha qaralady.
