Májilis depýtaty Ermurat Bapi Ulttyq quryltai quramyna engen jaǵdaida bul usynysty qarastyrýǵa daiyn ekenin, alaida onsyz da atqaryp jatqan mańyzdy jobalary jetkilikti ekenin aitty, dep habarlaidy dalanews.kz.
Onyń sózinshe, qazirgi ýaqytta birneshe jańa bastama qolǵa alynǵan. Sonyń biri – biylǵy «DAT» gazetiniń 30 jyldyǵyna arnalǵan «30 jylǵa – 30 is» jobasy.
«Ótsem, árine, qarastyramyn. Biraq meniń onsyz da atqaratyn sharýam kóp. Sońǵy ýaqytta birneshe jańa jobany qolǵa aldym. Máselen, biyl “DAT” gazetiniń 30 jyldyǵyna orai “30 jylǵa – 30 kitap” bastamasy aiasynda birqatar jumystardy júzege asyryp jatyrmyz. Kitaptar shyǵarý josparym da bar», – dedi depýtat.
Bapidiń aitýynsha, buǵan deiin bastalyp, aiaqtalmai qalǵan jobalardy da jalǵastyrý josparda bar.
Sonymen qatar ol qazirgi tańda Qazaqstannyń jańa tarihyna qatysty aýqymdy jobamen ainalysyp jatqanyn jetkizdi.
«Eń bastysy Qazaqstannyń jańa tarihyna qatysty úlken jobany qolǵa aldym. Qazir sonyń ústinde jumys istep jatyrmyn. Sondyqtan Quryltai quramyna enbei qalsam da, qoǵamǵa jáne halyqqa paidasy tiedi dep oilaityn mańyzdy sharýalarym jetkilikti», – dedi Ermurat Bapi.
Depýtattyń pikirinshe, qoǵamǵa qyzmet etý tek belgili bir keńesshi nemese konsýltativtik organnyń múshesi bolýmen shektelmeidi. Onyń aitýynsha, eldiń qoǵamdyq-saiasi ómirine yqpal etetin bastamalardy túrli alańdarda júzege asyrýǵa múmkindik bar.
