Ministr myrza áýeli elimizde ǵana emes, búkil álemde qalyptasyp otyrǵan ekstremizm men terrorizm máseleleri týraly baiandap, halyqqa dini saýattylyq jumystaryn úieli júrgizýdiń mańyzdylyǵy jóninde oiymen bólisti. Sońǵy jyldary elimizde ulttyq dástúr men dini qaǵidalardy bir-birine qarsy qoiý úrdisi beleń alyp bara jatqanyna qynjylǵan ministr, dini radikalizmniń órshimeýin qadaǵalaý úshin otbasylyq tárbieniń mańyzy zor ekenine toqtaldy.
«Ata-ana tárbiesi, otbasylyq qundylyq shaiqalǵan qoǵamnyń berekesi qashady. Biz óz jaýapkershiligimizdi umytpaýǵa tiispiz. Ata-ananyń balasy aldyndaǵy, balanyń ata-ana aldyndaǵy paryz-mindeti – úlkenge qurmet, kishige izet. Qazaq halqy muny jaqsy túsingen» degen ministr jat aǵymnyń jeteginde ketken jastardy qoǵam bolyp ortaǵa tartý kerek dep oilaidy.
[caption id="attachment_30159" align="alignleft" width="451"]
«Qyzdardyń betterin tumshalap qara kóilek kiiýi ultymyzdyń dástúrine jat. Bul bizdiń sana-sezimimizge de, zamanaýi damyǵan eldiń qoǵamdyq tártip pen qaýipsizdik talaptaryna da sáikes kelmeidi. Bul Taiaý Shyǵys elderiniń sol aimaqtyń aýa-raiy men turǵyndarynyń mádeni-tarihi ádet-ǵuryptary men salt-dástúrinen týyndaǵan áielderdiń dástúrli kiimi. Bizge óz mádeni-saltymyzǵa jaraspaityn kiimniń keregi joq», - dep atap ótti ministr.
Ministr qara kiimmen tumshalaný, júzin elden jasyrý – bizdiń uǵym-túsinigimizge de, saltymyzǵa da syiymsyz. Ejelgi qazaqtyń qyz-kelinshekteri eshqashan bulai tumshalanbaǵan. Imandylyq kiimmen emes, imanmen, izgi amalmen ólshenedi.
«Naǵyz musylman kigen kiiminen ne saqal qoiýymen emes, júregindegi ishki jan dúniesimen tanylady. Teke saqal men qara kiimder – ol úlken problemanyń bir ǵana bóligi. Bul jerde biz dástúrli saqal qoiý úrdisin aityp turǵan oqpyz. Dinge beriktik saqal men kiimge bailanysty emes», - dedi Ermekbaev.
«Ózińdi ósirgen, meditsina jáne baspanamen qamtamasyz etken, syrtqy jáne ishki qaýip-qaterlerden qorǵaǵan memlekettiń qaǵidattarymen kelispeýshiligińdi ashyq túrde kórsetý qaiyrymsyzdyqtyń eń joǵary satysy dep esepteimin. Al qaiyrymsyzdyq barlyq dinderde úlken kúná» ekenin eskerte kelip. «Dini bar da, ulty joq, saqaly bar da, murty joq. Teke saqal, qyrma murt, eldiń túbine sol jeter» dep, ǵulama Máshhur Júsiptiń oiymen sózin túiindegen ministr imamdar men dini qyzmetkerlerdi jastarmen áleýmettik jeli arqyly jumys asaýǵa úndedi. Aldaǵy ýaqytta dini aǵartýshylyq jumystaryn júieli túrde júrgizýdiń keshendi baǵdarlamasyn da jasaityny aityldy.
