Qazaqstan Respýblikasynyń Memlekettik keńesshisi Erlan Qarin Prezidenttiń «Ádiletti Qazaqstan» tujyrymdamasynda kórinis tapqan saiasaty basty bes tujyrym týraly aitty, - dep habarlaidy Dalanews.kz.
Memleket basshysy Qasym-Jomart Toqaevtyń 2019 jyldan beri dáiekti túrde júrgizip kele jatqan, ideologiialyq sipaty «Ádiletti Qazaqstan» tujyrymdamasynda kórinis tapqan saiasaty basty bes tujyrymǵa negizdelgen. Prezident onyń árqaisysyn ártúrli kezeńde usynyp, saiasi ómirge birtindep engizip keledi.
«Ártúrli pikir – birtutas ult» atty alǵashqy tujyrym «Ádildik jáne Ádiletti Qazaqstan degenimiz ne?» degen saýalǵa jaýap beredi. Bul jerde áńgimeniń túiini teń quqyly, syndarly talqylaý arqyly bárine ortaq bailam jasap, sheshim qabyldaý qajet degen paiymǵa kelip tireledi. Ádiletti Qazaqstandy qurý jolynda teńquqylyq qaǵidaty óte mańyzdy. Osy qaǵidat berik ornyqsa, azamattardyń bári óziniń jeke áleýetin júzege asyrý úshin áleýmettik jaǵdaiyna, ultyna, tili men dinine qaramastan birdei quqyqtar men múmkindikterge ie bolady.
«Halyq únine qulaq asatyn memleket» atty ekinshi tujyrym «ádildik QALAI ornaidy?» degen saýalǵa «el-jurtpen tyǵyz bailanysta bolyp, olardyń muń-muqtajyn tyńdai bilý arqyly ornyǵady» dep jaýap berýge negizdelgen. Degenmen «halyq únine qulaq asatyn memleket» uǵymy azamattardyń kúndelikti túitkilderin shuǵyl ári tiimdi sheshýdi ǵana meńzemeidi. Sonymen qatar, bul tujyrymdama elimizdi damytýǵa qatysty basty máseleler boiynsha qoǵamnyń barlyq ókiliniń pikirin eskere otyryp, baiypty ári ortaq sheshim qabyldanatynyn ańǵartady. «Halyq únine qulaq asatyn memlekettiń» jarqyn mysaly retinde Konstitýtsiiaǵa ózgerister engizý úshin ótkizilgen referendýmdy aitýǵa bolady.
Úshinshi tujyrym – «Zań jáne tártip» ádildik ornatýdyń ádis-tásilderin aiqyndaidy, iaǵni «Ádildikti qandai jolmen ornatamyz?» degen saýalǵa jaýap beredi. Zańdy múltiksiz saqtaý, barshanyń zań aldynda teń bolýy, eń bastysy zań buzǵan adamnyń qalaida jazasyn alýy – qoǵamda ádildikti ornyqtyrýdyń basty sharty. Osynyń bárin is júzinde oryndaý óte mańyzdy. Bul, ásirese, turmystyq-otbasylyq zorlyq-zombylyqqa, jemqorlyqqa qarsy kúreske qatysty oqiǵalardan aiqyn kórinedi. Qylmys jasaǵan adamnyń laiyqty jazalanýy – ádil sot tóreligi qaǵidatynyń kórinisi ǵana emes, sondai-aq qoǵamnyń sot júiesine jáne tutas memleketke degen seniminiń kórsetkishi. Bul rette myna jaitty túsinip alǵan jón. Zańdylyq pen quqyqtyq tártipti qamtamasyz etý – memlekettiń ǵana mindeti emes. «Zań jáne tártip» qaǵidatynyń qoǵamda ornyǵýyna barlyq azamat udaiy atsalysýǵa tiis.
Tórtinshi tujyrym – «Kúshti Prezident – yqpaldy Parlament – esep beretin Úkimet» Ádiletti Qazaqstannyń institýtsionaldyq aýqymyn aiqyndaidy, iaǵni «Ádiletti Qazaqstan» qandai bolýy kerek?» degen suraqqa jaýap beredi. 2019–2021 jyldardaǵy saiasi reformalardyń tórt toptamasy jáne 2022 jylǵy saiasi jańǵyrý baǵdarlamasy osy tujyrymdy naqty júzege asyrýǵa arnaldy. Sonyń nátijesinde bilik tarmaqtary arasynda tiimdi tepe-teńdik júiesi bar memlekettik qurylymnyń jańa institýtsionaldyq úlgisi qalyptasty.
Besinshi tujyrym – «Adal azamat» uǵymy «Ádiletti Qazaqstandy KIM qalyptastyrady?» degen saýalǵa jaýap bere otyryp, el-jurtymyzdyń rýhani-adami kelbeti bolashaqta qandai bolatynyn jáne azamattyq qoǵam qalai damitynyn kórsetedi. Memleket basshysy: «Adal azamat» – jaqsy qasietterge ie bolyp, adal eńbek etetin jáne tabysqa adal jolmen jetetin, adaldyq pen ádildikti bárinen biik qoiatyn adam» degen edi. Ideologiialyq tuǵyrnama týraly aitqanda myna máselege nazar aýdarǵan jón. Bul – qandai da bir qatyp qalǵan qaǵidalardy úgit-nasihat arqyly jasandy túrde jappai sanaǵa sińirý emes, kerisinshe, bizdiń qoǵamnyń rýhani birligin nyǵaita túsetin shynaiy qundylyqtardy dáripteý degen sóz.
Jalpy, Memleket basshysy usynǵan ideologiialyq tuǵyrnama elimizdi odan ári jan-jaqty jańǵyrtýǵa qatysy bar salalardyń bárine tyń serpin beredi.
