Túrkiia prezidenti Rejep Taiip Erdoǵan sheteldik investorlar men elge qonys aýdarǵysy keletin azamattardy tartýǵa baǵyttalǵan aýqymdy salyqtyq jeńildikter paketin jariialady. Onyń aitýynsha, bul sharalar Túrkiiany halyqaralyq kapital, saýda jáne talanttar úshin jahandyq tartymdylyq ortalyǵyna ainaldyrýǵa tiis, dep habarlaidy dalanews.kz.
Parlament qaraýyna usynylatyn bastamalar qatarynda eksporttaýshylar men óndirýshiler úshin korporativtik tabys salyǵyn aitarlyqtai tómendetý, tranzittik saýdadan túsetin tabysqa salynatyn salyqty barynsha azaitý, sondai-aq Túrkiiaǵa kóship keletin sheteldik rezidentterge 20 jyldyq salyqtyq demalys berý qarastyrylǵan.
Erdoǵan bul týraly Ystanbuldaǵy Dolmabahche jumys keńsesinde ótken «Túrkiia investitsiialyq ortalyǵy: kúsh ǵasyry» atty is-shara barysynda málimdedi. Ol bastamalardy álemdik ekonomikadaǵy turaqsyzdyq jaǵdaiymen bailanystyrdy.
Prezidenttiń aitýynsha, óńirlik qaqtyǵystardyń saldary men halyqaralyq saýdadaǵy ózgerister jahandyq ekonomikaǵa yqpalyn jalǵastyryp jatyr.
«Árbir biznes pen ekonomikanyń ár salasy qalyń tumannyń ishinde óz joly men baǵytyn izdep júr», – dedi Erdoǵan.
Ol sondai-aq jalǵasyp jatqan qaqtyǵystardyń áseri energetika, óndiris, saýda, týrizm jáne kólik salalarynda aiqyn sezilip otyrǵanyn atap ótti.
Jańa sharalardyń ishindegi eń mańyzdysynyń biri – shetelde turatyn aýqatty azamattar men joǵary bilikti mamandarǵa arnalǵan jeńildik. Sońǵy úsh jyl ishinde Túrkiianyń salyq rezidenti bolmaǵan jáne elge kóship kelýge sheshim qabyldaǵan adamdar 20 jyl boiy shetelde tapqan tabystary men kapital ósiminen Túrkiiada salyq tóleýden bosatylady.
Bul rette tek Túrkiia aýmaǵynda alynǵan tabysqa ǵana salyq salynady.
Sonymen qatar Erdoǵan mundai azamattar úshin muragerlik pen syiǵa tartýǵa salynatyn salyq mólsherlemesi 1 paiyz deńgeiinde belgilenetinin aitty.
Budan bólek, Túrkiia úkimeti sheteldegi aktivterdi elge qaitarýǵa jaǵdai jasaýdy josparlap otyr. Áńgime qolma-qol aqsha, altyn jáne baǵaly qaǵazdar týraly bolyp otyr. Bilik olardy belgili bir merzim ishinde tómendetilgen salyq mólsherlemesimen Túrkiiaǵa ákelýge múmkindik bermek.
Resmi Ankaranyń maqsaty – sheteldegi qarjyny ishki ekonomikaǵa qaita baǵyttap, investitsiialyq belsendilikti kúsheitý.
