Túrkiianyń Ulttyq qorǵanys ministrligi Ankara aspanynda atyp túsirilgen ushqyshsyz ushý apparatyna qatysty málimdeme jasady, dep habarlaidy Dalanews.kz.
Vedomstvo Ýkraina men Reseige Qara teńizdegi qaýipsizdik jaǵdaiyn ýshyqtyratyn áreketterge barmaý keregin eskertti.
«Ýkraina men Resei arasyndaǵy jalǵasyp jatqan soǵysqa bailanysty biz óz áriptesterimizge Qara teńiz qaýipsizdigine qatysty osyndai jaǵymsyz faktorlar turǵysynan eki taraptyń da barynsha saq bolýy qajet ekenin eskerttik», – delingen ministrlik málimdemesinde.
15 jeltoqsan kúni keshke Túrkiia Qorǵanys ministrligi Qara teńiz jaqtan eldiń áýe keńistigine jaqyndaǵan ushqyshsyz apparatty Túrkiia Áýe kúshteriniń F-16 joiǵyshtary atyp túsirgenin habarlady. Túrik áskeri ony qaýipsizdik maqsatynda joiǵan.
«Júrgizilgen baǵalaý nátijesinde áýe keńistiginiń qaýipsizdigin qamtamasyz etý, sondai-aq azamattarymyzdyń ómiri men múlkin qorǵaý maqsatynda baqylaýdan shyqqandai kóringen ushqyshsyz ushý apparaty F-16 joiǵyshtarymen ilesip júrip, qajetti rásimder aiaqtalǵan soń eń qolaily jerde baqylanatyn maniovr barysynda joiyldy», – dep atap ótti vedomstvo.
Ankara dronnyń qai elge tiesili ekeni naqtylaǵan joq. 18 jeltoqsanda Túrkiia Qorǵanys ministrligi joiylǵan ushqyshsyz apparattyń usaq bólshekterge ydyrap, úlken aýmaqqa shashylǵanyn málimdedi. Osyǵan bailanysty onyń shyqqan tegin anyqtaý qiynǵa soǵyp otyrǵany aityldy.
Ushqyshsyz apparatqa bailanysty bolǵan oqiǵa Túrkiianyń áýe shabýylyna qarsy qorǵanys jáne radiolokatsiialyq júieleriniń tiimdiligi jóninde suraqtar týǵyzdy.
Alaida Túrkiia Qorǵanys ministrligi bul syndardy joqqa shyǵaryp, «áýe keńistigin baqylaý kópdeńgeili ári integratsiialanǵan arhitektýra arqyly táýlik boiy júzege asyrylady» dep málimdedi.
Jýyrda Rejep Taiyp Erdoǵan da Ýkraina men Reseige Qara teńizdegi kemelerge jasalǵan shabýyldarǵa bailanysty «eskertý» joldaǵan.
«Sońǵy ózara shabýyldar Qara teńizdegi keme qatynasynyń qaýipsizdigine eleýli qater tóndiredi. Kommertsiialyq jáne azamattyq kemelerge shabýyl jasaý eshkimge paida ákelmeidi. Biz bul másele boiynsha eskertýlerimizdi eki tarapqa da anyq jetkizip otyrmyz», – dedi Erdoǵan.
