Áýezov aýdanynyń ákimi Abzal Egemberdiev 7 jáne 12 shaǵyn aýdandarda 35 aýla ornalasqanyn, onyń 24-i aǵymdaǵy jyly jóndelgenin alǵa tartty.
Modernizatsiialaý aiasynda aýlalarda basketbol, fýtbol alańdary salynǵan. Aýlalarǵa sapaly jaryq shamdar ornatylypty.
Jumysty «Senim QurylysServis» JShS merdigerlik uiymy júrgizýde. Turǵyndardyń ótinishi boiynsha turaq aimaqtary qosymsha keńeitilip, biýdjet qarajatynyń únemdelýi esebinen kógaldandyrý isi de júzege asqan.
Áýezov aýdany – Almatydaǵy halyq tyǵyz qonystanǵan aýmaq, aýdannyń turǵyn úi qory 1 700 kóppáterli úiden asady. Aýdannyń aýmaǵynda 966 aýla ornalasqan. Bul qalanyń basqa aýdandaryna qaraǵanda kóp.
Almaty ákimi Erbolat Dosaev barlyq aýlalardyń jaǵdaiyn taldap, úi mańyndaǵy aýmaqtardy jóndeý baǵdarlamasyn jalǵastyrýdy tapsyrdy. Qala basshysy vandalizmdi boldyrmaý úshin barlyq aýlalardy beinebaqylaýmen jabdyqtaý qajettigin atap ótti.
Sondai-aq, aýdandy aralaý barysynda Erbolat Dosaev sý basý, kógaldandyrý jáne jańa demalys aimaǵy taqyrybynda 7 jáne 12 shaǵyn aýdandardyń turǵyndarymen kezdesý ótkizdi.
Qala basshysy qazirgi ýaqytta kúzgi ekpeler jalǵasyp jatqanyn – aǵymdaǵy jyly kógaldandyrý aiaqtalmaǵanyn, sý basý problemalary josparly túrde sheshiletinin atap ótti.
Budan basqa, 2024 jylǵa «Halyq qatysatyn biýdjet» baǵdarlamasyn qarjylandyrý ulǵaityp, qalanyń 6 aýdanyna 2 mlrd teńgeden jáne Alataý jáne Naýryzbai aýdandaryna 2,5 mlrd teńgeden bólý josparlanyp jatqanyn jetkizdi. Qosymsha qarajat halyqtyń eń ózekti jáne suranysqa ie jobalaryn iske asyrýǵa baǵyttalatyn bolady.
Aite ketýimiz kerek, aýla aýmaqtaryn kúrdeli jóndeý aiasynda 2022 jyldan 2023 jylǵa deiin Áýezov aýdanynyń (8, 9, 10, 11 sh/a jáne Jetisý-1,2,3,4) 167 aýlasynda jumystar aiaqtaldy.
