Áskeri boryshyn óteý kezinde aýyr bas súiek-mi jaraqatyn alǵan sarbaz Erbaian Muhtar shuǵyl túrde Ulttyq shuǵyl meditsinany úilestirý ortalyǵynyń aýrýhanasyna jatqyzyldy, dep habarlaidy dalanews.kz.
Bul týraly Erbaiandy emdeýge qatysyp júrgen Ulpan Sovetbekqyzy habarlady.
Onyń aitýynsha, ózi de qazir em qabyldap, aýrýhana paraǵynda júrgenine qaramastan, Erbaiannyń ata-anasynyń ótinishimen kópshilikke úndeý jasaýǵa májbúr bolǵan.
– Qazir Erbaian jansaqtaý bóliminde jatyr, al ata-anasy onyń densaýlyq jaǵdaiyna qatysty qajetti aqparatty tolyq ala almai otyr. Sondyqtan barshańyzdy beijai qalmai, qoldan kelgen kómekti kórsetip, qoldaý bildirýge shaqyramyz. Oǵan duǵa jasap, jaqsy tilekterińizdi arnańyzdar. Bul qazir Erbaian úshin de, onyń otbasy úshin de óte mańyzdy. Qoldaý bildirip, alańdap júrgen ár adamǵa alǵys aitamyz, – delingen habarlamada.
Eske salsaq, buǵan deiin Ulttyq ulan ókilderi merzimdi áskeri qyzmetin ótep júrgen sarbaz Erbaian Muhtardyń dárethanada qulap qalyp, jaraqat alǵanyn málimdegen edi. Alaida sarbazdyń ata-anasy bul nusqamen kelispeitinderin aitqan.
Belgili bolǵandai, Erbaian Muhtar 2023 jyldyń jeltoqsan aiynda aýrýhanaǵa túsken. Osy ýaqytqa deiin oǵan bes ret operatsiia jasalǵan.
