Áleýmettik jelilerde Abai atyndaǵy Qazaq ulttyq pedagogikalyq ýniversitetinde (QazUPÝ) ótkizilgen jiyn daý týǵyzdy. Bul jiynda birinshi kýrs stýdentterine qyz bala qoǵamda jáne er adamdarmen ózin qalai ustaý kerek ekeni aitylǵan. Ǵylym jáne joǵary bilim ministrligi jaǵdaiǵa pikir bildirdi, – dep habarlaidy Dalanews.kz.
Úkimette ótken brifingte vitse-ministr Talǵat Eshenqulovtan oqiǵadan keiin qandai sharalar qoldanylǵany suraldy.
"Ýniversitettiń málimetinshe, mundai tárbielik is-sharalar jii ótkizilip turady. Esigi ashyq, tilek bildirgen stýdentter kele alady. Mundai is-sharalar tárbie jumysy aiasynda ótkizilip jatyr, iaǵni bizde tárbie jumysynyń bekitilgen tujyrymdamasy bar. Búginde ýniversitet qorytyndylar shyǵardy, belgili bir profilaktikalyq, túsindirý jumystary júrgizildi. Bul endi qaitalanbaidy", - dedi Eshenqulov.
Aita keteiik, daýly is-sharaǵa birinshi kýrstyń stýdent qyzdary qatysqan. Jiyn barysynda olarǵa "qyz bala inabatty, ibaly bolýy kerek", "ashyq-shashyq kiinýge bolmaidy", "er adamdy kórgende iilip sálem berý – ádep belgisi", "uzyn beldemshe – tárbieniń nyshany" degen mazmundaǵy nasihat júrgizilgen.
Sonymen qatar, ártúrli jastaǵy er adamdardyń qyzdardyń minez-qulqy jaily aitqan videolary kórsetilgen.
Bul oqiǵa áleýmettik jeli qoldanýshylarynyń narazylyǵyn týǵyzdy. Jelide "Nege tek qyzdar? Jigitterge nege eshteńe aitylmaidy?", "Áielderdi emes, erlerdi de tárbieleńizder" degen syni pikirler kóbeidi.
