Senat depýtattary kúni keshe bank saıasaty salasyndaǵy kelisimderdi ratıfıkasıalady. Máselen, maquldanǵan "Eýropa Qaıta qurý jáne damý bankin qurý týraly kelisimniń 1-babyna bank operasıalaryn geografıalyq qamtýdy Saharadan ońtústikke qaraı ornalasqan Afrıka elderi men Irakqa shekteýli túrde jáne birtindep qoldanýdy júzege asyrýǵa múmkindik beretin túzetýlerdi ratıfıkasıalaý týraly" zań bank operasıalarynyń geografıalyq aýqymyn keńeıtýdi kózdeıdi, dep jazady Dalanews.kz.
Qazaqstan úshin Afrıkany bank operasıalary aımaǵyna qosý mıllıardtaǵan halqy bar elderdiń jobalarymen baılanys ornatýda jáne ınvestısıalardy júzege asyrýda jańa múmkindikterge jol ashady dep boljanady. Bank qyzmetin bulaı keńeıtý onyń qazirgi operasıalyq elderin qoldaý qabiletin tómendetpeıdi, banktiń AAA deńgeıindegi kredıttik reıtıńine qaýip tóndirmeıdi jáne kapıtalǵa qosymsha jarnalardy talap etpeıdi.
Sondaı-aq Senattaǵy otyrys kezinde qaralyp, maquldanǵan "Eýropa Qaıta qurý jáne damý bankin qurý týraly kelisimniń 12-babynyń 1-tarmaǵyna jaı operasıalarǵa jarǵylyq kapıtaldy shekteýdiń kúshin joıý maqsatyndaǵy túzetýlerdi ratıfıkasıalaý týraly" zań EQDB Dırektorlar keńesine bank kapıtalynyń jetkiliktiligi normatıvteri týraly jedel sheshim qabyldaýǵa múmkindik beredi. Bul kredıttik qyzmettiń ıkemdiligin arttyrady jáne Qazaqstannyń negizgi jobalaryn tıimdi qarjylandyrýdy qamtamasyz etedi.
Sondaı-aq Senatta maquldanǵan "Memlekettik (mýnısıpaldyq) satyp alýdy júzege asyrý kezinde bank kepildikterin ózara taný týraly kelisimdi ratıfıkasıalaý týraly" zań EAEO-nyń ózge elderinde banktik kepildikterdi paıdalaný úshin quqyqtyq negiz qalyptastyrady. Bul qazaqstandyq jetkizýshilerdiń EAEO elderindegi memlekettik satyp alýlarǵa qatysýyn jeńildetýge múmkindik beredi.
"Qaralǵan kelisim Eýrazıalyq ekonomıkalyq odaqqa múshe memleketter arasynda bank kepildikterin ózara taný úshin quqyqtyq negiz qalyptastyrýdy kózdeıdi. Zańnyń maquldanýy Eýrazıalyq ekonomıkalyq odaqqa múshe memleketterdiń memlekettik satyp alýlaryna qatysý úshin bızneske teń múmkindik jasaýǵa, sondaı-aq, taraptar arasyndaǵy ekonomıkalyq belsendilikti arttyrýǵa múmkindik beredi dep senemiz", – dedi Máýlen Áshimbaev.
Aıta ketsek,EQDB quramyna Qazaqstandy qosa eseptegende 72 memleket kiredi.
