سەنات دەپۋتاتتارى كۇنى كەشە بانك ساياساتى سالاسىنداعى كەلىسىمدەردى راتيفيكاسيالادى. ماسەلەن، ماقۇلدانعان "ەۋروپا قايتا قۇرۋ جانە دامۋ بانكىن قۇرۋ تۋرالى كەلىسىمنىڭ 1-بابىنا بانك وپەراسيالارىن گەوگرافيالىق قامتۋدى ساحارادان وڭتۇستىككە قاراي ورنالاسقان افريكا ەلدەرى مەن يراكقا شەكتەۋلى تۇردە جانە بىرتىندەپ قولدانۋدى جۇزەگە اسىرۋعا مۇمكىندىك بەرەتىن تۇزەتۋلەردى راتيفيكاسيالاۋ تۋرالى" زاڭ بانك وپەراسيالارىنىڭ گەوگرافيالىق اۋقىمىن كەڭەيتۋدى كوزدەيدى، دەپ جازادى Dalanews.kz.
قازاقستان ءۇشىن افريكانى بانك وپەراسيالارى ايماعىنا قوسۋ ميللياردتاعان حالقى بار ەلدەردىڭ جوبالارىمەن بايلانىس ورناتۋدا جانە ينۆەستيسيالاردى جۇزەگە اسىرۋدا جاڭا مۇمكىندىكتەرگە جول اشادى دەپ بولجانادى. بانك قىزمەتىن بۇلاي كەڭەيتۋ ونىڭ قازىرگى وپەراسيالىق ەلدەرىن قولداۋ قابىلەتىن تومەندەتپەيدى، بانكتىڭ ااا دەڭگەيىندەگى كرەديتتىك رەيتينگىنە ءقاۋىپ توندىرمەيدى جانە كاپيتالعا قوسىمشا جارنالاردى تالاپ ەتپەيدى.
سونداي-اق سەناتتاعى وتىرىس كەزىندە قارالىپ، ماقۇلدانعان "ەۋروپا قايتا قۇرۋ جانە دامۋ بانكىن قۇرۋ تۋرالى كەلىسىمنىڭ 12-بابىنىڭ 1-تارماعىنا جاي وپەراسيالارعا جارعىلىق كاپيتالدى شەكتەۋدىڭ كۇشىن جويۋ ماقساتىنداعى تۇزەتۋلەردى راتيفيكاسيالاۋ تۋرالى" زاڭ ەقدب ديرەكتورلار كەڭەسىنە بانك كاپيتالىنىڭ جەتكىلىكتىلىگى نورماتيۆتەرى تۋرالى جەدەل شەشىم قابىلداۋعا مۇمكىندىك بەرەدى. بۇل كرەديتتىك قىزمەتتىڭ يكەمدىلىگىن ارتتىرادى جانە قازاقستاننىڭ نەگىزگى جوبالارىن ءتيىمدى قارجىلاندىرۋدى قامتاماسىز ەتەدى.
سونداي-اق سەناتتا ماقۇلدانعان "مەملەكەتتىك (مۋنيسيپالدىق) ساتىپ الۋدى جۇزەگە اسىرۋ كەزىندە بانك كەپىلدىكتەرىن ءوزارا تانۋ تۋرالى كەلىسىمدى راتيفيكاسيالاۋ تۋرالى" زاڭ ەاەو-نىڭ وزگە ەلدەرىندە بانكتىك كەپىلدىكتەردى پايدالانۋ ءۇشىن قۇقىقتىق نەگىز قالىپتاستىرادى. بۇل قازاقستاندىق جەتكىزۋشىلەردىڭ ەاەو ەلدەرىندەگى مەملەكەتتىك ساتىپ الۋلارعا قاتىسۋىن جەڭىلدەتۋگە مۇمكىندىك بەرەدى.
"قارالعان كەلىسىم ەۋرازيالىق ەكونوميكالىق وداققا مۇشە مەملەكەتتەر اراسىندا بانك كەپىلدىكتەرىن ءوزارا تانۋ ءۇشىن قۇقىقتىق نەگىز قالىپتاستىرۋدى كوزدەيدى. زاڭنىڭ ماقۇلدانۋى ەۋرازيالىق ەكونوميكالىق وداققا مۇشە مەملەكەتتەردىڭ مەملەكەتتىك ساتىپ الۋلارىنا قاتىسۋ ءۇشىن بيزنەسكە تەڭ مۇمكىندىك جاساۋعا، سونداي-اق، تاراپتار اراسىنداعى ەكونوميكالىق بەلسەندىلىكتى ارتتىرۋعا مۇمكىندىك بەرەدى دەپ سەنەمىز"، – دەدى ماۋلەن اشىمبايەۆ.
ايتا كەتسەك،ەقدب قۇرامىنا قازاقستاندى قوسا ەسەپتەگەندە 72 مەملەكەت كىرەدى.
