AQSh Ádilet ministrligi jariialaǵan Djeffri Epshtein isine qatysty materialdarda Qazaqstannyń burynǵy premer-ministri ári UQK-niń eks-tóraǵasy Kárim Másimovtiń esimi birneshe márte kezdesedi. Qujattarda onyń aty keminde segiz fragmentte, sonyń ishinde elektrondy hattar men habarlama formatyndaǵy jazbalarda atalǵan, dep habarlaidy Dalanews.kz.
Jariialanǵan materialdar 2011–2015 jyldar aralyǵyn qamtidy.
Atap aitqanda, 2011 jyldyń tamyzynda Epshteinge joldanǵan hattardyń birinde jiberýshi ózin Qazaqstanda Kárim Másimovtiń kórshisi retinde tanystyryp, adresattan onymen tanys-tanys emestigin suraidy.
Taǵy bir hat-habar almasýda esimi kórsetilmegen jiberýshi Epshteinge Másimovke «sálem aitqanyn» habarlaǵan.
Sonymen qatar materialdarda Qazaqstannyń burynǵy vitse-premeri ári Ulttyq banktiń eks-tóraǵasy Qairat Kelimbetovtiń esimi de birneshe ret atalady.
2014 jylǵa tiesili hattardyń birinde jiberýshi Epshteinnen: «Másimovke aita buiymtaiyńyz bar ma?» dep suraidy.
Epshtein óz jaýabynda jai ǵana «áńgimelesýdi» usynatynyn aityp, úshinshi bir adam arqyly Niý-Iorkte «jaqsy ýaqyt ótkizgen» Kelimbetovke «sálem aitýǵa» bolatynyn jazady.
Qujat mazmunyna qaraǵanda, áńgime taǵy da Qairat Kelimbetov týraly bolýy múmkin.
Hattar men habarlamalardyń skrinshottary AQSh Ádilet ministrliginiń resmi faildarynyń quramynda jariialanǵan. Alaida materialdarda Kárim Másimovtiń Djeffri Epshteinmen jeke kezdeskeni týraly naqty derek joq.
Djeffri Epshtein - amerikalyq qarjyger, milliarder, seksýaldyq qylmystarmen aty shyqqan tulǵa.
2008 jyly ol jezókshelikke tartý isi boiynsha kinásin moiyndap, kámeletke tolmaǵan qyzdy zorlaǵany úshin sottalǵan. 2019 jyly adam saýdasy men jezókshelikke tartý aiyptarymen qaita qamaýǵa alynǵan. Sot úkimin kútpesten, ol qamaýda ózine qol jumsaǵan.
Epshtein kámeletke tolmaǵan qyzdardy seksýaldyq qanaýǵa tartqan júieli jeliniń uiymdastyrýshysy retinde atalady.
