اقش ادىلەت مينيسترلىگى جاريالاعان دجەففري ەپشتەين ىسىنە قاتىستى ماتەريالداردا قازاقستاننىڭ بۇرىنعى پرەمەر-مينيسترى ءارى ۇقك-نىڭ ەكس-توراعاسى كارىم ءماسىموۆتىڭ ەسىمى بىرنەشە مارتە كەزدەسەدى. قۇجاتتاردا ونىڭ اتى كەمىندە سەگىز فراگمەنتتە، سونىڭ ىشىندە ەلەكتروندى حاتتار مەن حابارلاما فورماتىنداعى جازبالاردا اتالعان، دەپ حابارلايدى Dalanews.kz.

جاريالانعان ماتەريالدار 2011–2015 جىلدار ارالىعىن قامتيدى.

اتاپ ايتقاندا، 2011 جىلدىڭ تامىزىندا ەپشتەينگە جولدانعان حاتتاردىڭ بىرىندە جىبەرۋشى ءوزىن قازاقستاندا كارىم ءماسىموۆتىڭ كورشىسى رەتىندە تانىستىرىپ، ادرەساتتان ونىمەن تانىس-تانىس ەمەستىگىن سۇرايدى.

تاعى ءبىر حات-حابار الماسۋدا ەسىمى كورسەتىلمەگەن جىبەرۋشى ەپشتەينگە ماسىموۆكە «سالەم ايتقانىن» حابارلاعان.

سونىمەن قاتار ماتەريالداردا قازاقستاننىڭ بۇرىنعى ۆيسە-پرەمەرى ءارى ۇلتتىق بانكتىڭ ەكس-توراعاسى قايرات كەلىمبەتوۆتىڭ ەسىمى دە بىرنەشە رەت اتالادى.

2014 جىلعا تيەسىلى حاتتاردىڭ بىرىندە جىبەرۋشى ەپشتەيننەن: «ماسىموۆكە ايتا بۇيىمتايىڭىز بار ما؟» دەپ سۇرايدى.

ەپشتەين ءوز جاۋابىندا جاي عانا «اڭگىمەلەسۋدى» ۇسىناتىنىن ايتىپ، ءۇشىنشى ءبىر ادام ارقىلى نيۋ-يوركتە «جاقسى ۋاقىت وتكىزگەن» كەلىمبەتوۆكە «سالەم ايتۋعا» بولاتىنىن جازادى.

قۇجات مازمۇنىنا قاراعاندا، اڭگىمە تاعى دا قايرات كەلىمبەتوۆ تۋرالى بولۋى مۇمكىن.

حاتتار مەن حابارلامالاردىڭ سكرينشوتتارى اقش ادىلەت مينيسترلىگىنىڭ رەسمي فايلدارىنىڭ قۇرامىندا جاريالانعان. الايدا ماتەريالداردا كارىم ءماسىموۆتىڭ دجەففري ەپشتەينمەن جەكە كەزدەسكەنى تۋرالى ناقتى دەرەك جوق.

دجەففري ەپشتەين - امەريكالىق قارجىگەر، ميللياردەر، سەكسۋالدىق قىلمىستارمەن اتى شىققان تۇلعا.

2008 جىلى ول جەزوكشەلىككە تارتۋ ءىسى بويىنشا كىناسىن مويىنداپ، كامەلەتكە تولماعان قىزدى زورلاعانى ءۇشىن سوتتالعان. 2019 جىلى ادام ساۋداسى مەن جەزوكشەلىككە تارتۋ ايىپتارىمەن قايتا قاماۋعا الىنعان. سوت ۇكىمىن كۇتپەستەن، ول قاماۋدا وزىنە قول جۇمساعان.

ەپشتەين كامەلەتكە تولماعان قىزداردى سەكسۋالدىق قاناۋعا تارتقان جۇيەلى جەلىنىڭ ۇيىمداستىرۋشىسى رەتىندە اتالادى.