Eýroparlament zańsyz migranttardy elderine qaitarý tártibin ózgertetin jańa reglamentti qoldady, dep habarlaidy dalanews.kz.
Qujatqa sáikes, Eýroodaqqa múshe memleketter endi migranttardy tek shyqqan eline ǵana emes, EO aýmaǵynan tys ornalasqan arnaiy ortalyqtarǵa da jibere alady.
Deutsche Welle málimetinshe, eger migranttyń týǵan eli ony qabyldaýdan bas tartsa, ol úshinshi memleketterdegi arnaiy "qaitarý habtaryna" ornalastyrylýy múmkin. Mundai ortalyqtar Afrika memleketterimen birge Qazaqstan men Ózbekstanda da ashylýy múmkin.
Alaida ázirge bul bastamaǵa qai memleketterdiń naqty qatysatyny belgisiz. Qazaqstan men Ózbekstan biligi tarapynan mundai ortalyqtardy óz aýmaǵynda ornalastyrýǵa daiyn ekeni jóninde resmi málimdeme jasalǵan joq.
Basylymnyń jazýynsha, Eýroodaq mundai áriptestikke kelisken elderge ekonomikalyq qoldaý kórsetýi nemese viza rejimin jeńildetý máselesin qarastyrýy múmkin.
