Ónerkásip jáne qurylys ministrligi Aýyl sharýashylyǵy ministrligimen birlesip, Qazaqstanda balamasy shyǵarylatyn sheteldik aýyl sharýashylyǵy tehnikalaryna sýbsidiia berýden bas tartýdy kózdeitin qujat qabyldady. Bul týraly premer-ministrdiń baspasóz qyzmeti habarlady.
Qazirgi ýaqytta elimizde qýaty men modifikatsiiasy ár túrli traktor, astyq pen jem-shóp jinaityn kombainnyń 15-ten astam brendin shyǵaratyn 8 zaýyt jumys isteidi. 2023 jyldyń qorytyndysy boiynsha otandyq óndirýshiler 113,5 mlrd teńgege 5 418 traktor, 99,1 mlrd teńgege 1 032 kombain shyǵarǵan.
Buǵan deiin importtyq jáne otandyq tehnikaǵa beriletin sýbsidiialar kólemindegi aiyrmashylyq sheteldik óndirýshilerge kóbirek bolyp keldi. Aitalyq, 70,2 mlrd ótemaqy kóleminiń 28,3 mlrd-y (40,4%) — jergilikti kásiporyndarǵa, 41,9 mlrd-y (59,6%) importqa baǵyttaldy. Soǵan bailanysty qazaqstandyq zaýyttardyń ónimderi azyraq alynatyn. Endi jańa tásil boiynsha sheteldik óndirýshilerdi sýbsidiialaý úlesi shashamen 6 esege – 6,5 mlrd-qa (9,3%) deiin tómendetiledi. Osylaisha otandyq óndirýshiler úlesin 63,7 mlrd-qa (90,7%) deiin jetkizý josparlanyp otyr.
2021 jyly «ST ESEMBLI» kásipornynda TUCANO 450 jáne TUCANO 580 kombaindary qurastyryla bastaǵan kezde Claas-pen arnaiy investitsiialyq kelisimshartqa qol qoiyldy. 2 jyldan keiin jergilikti óndirýshilerdiń komponentterin «Agromash Holding» AQ, «Qazaqstan Agro Innovatsiialyq Korporatsiiasy» JShS, «ShyǵysMash Zavod» AQ, «Reimann» JShS jetkize bastady. Kásiporynda 2023 jyly ózdiginen júretin tehnikadan 246 birlik jáne 158 tirkeme tehnika qurastyryldy. Biyl traktorlar qatary jańartylyp, keńeitildi. Zaýyt iske qosylǵan sátten bastap óndirispen qamtamasyz etilgen jumys oryndary sany 2 esege artty – qazirgi tańda kásiporynda 73 qyzmetker jumys isteidi.
Qazaqstanda óndirisi jolǵa qoiylmaǵan pozitsiialarǵa, atap aitqanda qant qyzylshasyn, maqta óndirýge, kartop, jemis-kókónis t.b. jinaýǵa mamandandyrylǵan tehnikalarǵa bul jańa tetiktiń qatysy joq. Bul jaǵdaida óndiris eline qaramastan 25% deńgeiinde sýbsidiialaý normativi qarastyrylǵan.
Jalpy qazaqstandyq aýyl sharýashylyǵy mashinasyn jasaityn kásiporyndary qazirgi tańda ózdiginen júretin tehnika naryqtyń shamamen 80%-yn qamtidy. Bul rette elimizde sharýalardyń shamamen 90%-yn shaǵyn jáne orta fermerler quraidy, olar úshin jeńildikti lizingtik quraldar men qoljetimdi tehnika mashina-traktor parkin jańartýǵa múmkindik beredi.
