ونەركاسىپ جانە قۇرىلىس مينيسترلىگى اۋىل شارۋاشىلىعى مينيسترلىگىمەن بىرلەسىپ، قازاقستاندا بالاماسى شىعارىلاتىن شەتەلدىك اۋىل شارۋاشىلىعى تەحنيكالارىنا سۋبسيديا بەرۋدەن باس تارتۋدى كوزدەيتىن قۇجات قابىلدادى. بۇل تۋرالى پرەمەر-مينيستردىڭ باسپا ءسوز قىزمەتى حابارلادى.
قازىرگى ۋاقىتتا ەلىمىزدە قۋاتى مەن موديفيكاسياسى ءار ءتۇرلى تراكتور، استىق پەن جەم-شوپ جينايتىن كومبايننىڭ 15-تەن استام برەندىن شىعاراتىن 8 زاۋىت جۇمىس ىستەيدى. 2023 جىلدىڭ قورىتىندىسى بويىنشا وتاندىق وندىرۋشىلەر 113،5 ملرد تەڭگەگە 5 418 تراكتور، 99،1 ملرد تەڭگەگە 1 032 كومباين شىعارعان.
بۇعان دەيىن يمپورتتىق جانە وتاندىق تەحنيكاعا بەرىلەتىن سۋبسيديالار كولەمىندەگى ايىرماشىلىق شەتەلدىك وندىرۋشىلەرگە كوبىرەك بولىپ كەلدى. ايتالىق، 70،2 ملرد وتەماقى كولەمىنىڭ 28،3 ملرد-ى (40،4%) — جەرگىلىكتى كاسىپورىندارعا، 41،9 ملرد-ى (59،6%) يمپورتقا باعىتتالدى. سوعان بايلانىستى قازاقستاندىق زاۋىتتاردىڭ ونىمدەرى ازىراق الىناتىن. ەندى جاڭا ءتاسىل بويىنشا شەتەلدىك وندىرۋشىلەردى سۋبسيديالاۋ ۇلەسى شاشامەن 6 ەسەگە – 6،5 ملرد-قا (9،3%) دەيىن تومەندەتىلەدى. وسىلايشا وتاندىق وندىرۋشىلەر ۇلەسىن 63،7 ملرد-قا (90،7%) دەيىن جەتكىزۋ جوسپارلانىپ وتىر.
2021 جىلى «ست ەسەمبلي» كاسىپورنىندا TUCANO 450 جانە TUCANO 580 كومبايندارى قۇراستىرىلا باستاعان كەزدە Claas-پەن ارنايى ينۆەستيسيالىق كەلىسىمشارتقا قول قويىلدى. 2 جىلدان كەيىن جەرگىلىكتى وندىرۋشىلەردىڭ كومپونەنتتەرىن «اگروماش حولدينگ» اق، «قازاقستان اگرو يننوۆاسيالىق كورپوراسياسى» ج ش س، «شىعىسماش زاۆود» اق، «Reimann» ج ش س جەتكىزە باستادى. كاسىپورىندا 2023 جىلى وزدىگىنەن جۇرەتىن تەحنيكادان 246 بىرلىك جانە 158 تىركەمە تەحنيكا قۇراستىرىلدى. بيىل تراكتورلار قاتارى جاڭارتىلىپ، كەڭەيتىلدى. زاۋىت ىسكە قوسىلعان ساتتەن باستاپ وندىرىسپەن قامتاماسىز ەتىلگەن جۇمىس ورىندارى سانى 2 ەسەگە ارتتى – قازىرگى تاڭدا كاسىپورىندا 73 قىزمەتكەر جۇمىس ىستەيدى.
قازاقستاندا ءوندىرىسى جولعا قويىلماعان پوزيسيالارعا، اتاپ ايتقاندا قانت قىزىلشاسىن، ماقتا وندىرۋگە، كارتوپ، جەمىس-كوكونىس ت.ب. جيناۋعا مامانداندىرىلعان تەحنيكالارعا بۇل جاڭا تەتىكتىڭ قاتىسى جوق. بۇل جاعدايدا ءوندىرىس ەلىنە قاراماستان 25% دەڭگەيىندە سۋبسيديالاۋ ءنورماتيۆى قاراستىرىلعان.
جالپى قازاقستاندىق اۋىل شارۋاشىلىعى ماشيناسىن جاسايتىن كاسىپورىندارى قازىرگى تاڭدا وزدىگىنەن جۇرەتىن تەحنيكا نارىقتىڭ شامامەن 80%-ىن قامتيدى. بۇل رەتتە ەلىمىزدە شارۋالاردىڭ شامامەن 90%-ىن شاعىن جانە ورتا فەرمەرلەر قۇرايدى، ولار ءۇشىن جەڭىلدىكتى ليزينگتىك قۇرالدار مەن قولجەتىمدى تەحنيكا ماشينا-تراكتور پاركىن جاڭارتۋعا مۇمكىندىك بەرەدى.
