QR Eńbek jáne halyqty áleýmettik qorǵaý ministrligi "Qazaqmys korporatsiiasy" JShS "Jezqazǵantústimet" óndiristik birlestiginiń ereýilge shyqqan jumyskerlerge qatysty málimdeme jasady, - dep habarlaidy Dalanews.kz.
Ministrlik jumyskerler eńbek zańnamasynyń normalaryn buzǵanyn málimdedi jáne kompaniia jumyskerlerin óz jumystaryn qaita bastaýǵa shaqyrady jáne olardyń jumys berýshige qoiylatyn talaptaryn belgilengen tártippen talqylaýdy usyndy.
Osy jyldyń 17-18 jeltoqsanynda "Jezqazǵantústimet" ÓB birneshe shahtasynyń jumyskerleri jalaqyny kóterý talabymen jumysty toqtatty. Jumyskerlerdiń bul áreketteri eńbek zańnamasynda kózdelgendei talaptardy usyný tártibin jáne olardy jumys berýshiniń qaraý retin buza otyryp júrgizildi.
QR Eńbek kodeksine sáikes qoldanystaǵy tártip: osy talaptardy jumys berýshige resmi joldaýdy, olardy jumys berýshimen qaralýyn, al ony sheshý múmkin bolmaǵan jaǵdaida tatýlastyrý komissiiasynda qarastyrýdy kózdeidi.
Jumyskerlerdiń talaptaryn qaraýdyń atalǵan tártibi óndiristik protsesti toqtata turýdy kózdemeidi. Zańnamada belgilengen tártipti saqtamaý tártiptik jaýaptylyqqa ákep soǵady.
Qalyptasqan jaǵdaidy retteý maqsatynda Eńbekmini taraptardy tatýlastyrý komissiiasy sheńberinde jáne tek quqyq aiasynda tatýlastyrý rásimderin júrgizýge jáne jumysqa qaita kirisýge shaqyrady.
