Ońtústik Koreia Qazaqstanǵa 15 myń zańsyz migrantyn qaitaryp alý jolyn qarastyrýdy talap etti. Bul týraly 14 qazanda Májilis dálizinde jýrnalisterge bergen suqbatynda Eńbek jáne halyqty áleýmettik qorǵaý ministri Svetlana Jaqypova aitty, dep habarlaidy Dalanews.kz.
"Zańdy eńbekpen qamsyzdandyrý jónindegi kelisim boiynsha bizdiń tarap qujattarǵa qol qoiyp, SIM arqyly Ońtústik Koreiaǵa joldap qoidy. Endi ony sol eldiń memlekettik organdary qaraidy. Olar bizge úsh shart qoiyp otyr. Birinshiden, bizdiń Ońtústik Koreiadaǵy elshiligimizde jumysqa ornalastyrý jónindegi attashe laýazymy qurylýy kerek. Ekinshiden, onda zańsyz júrgen 15 myńǵa jýyq otandasymyzdy korei tarapy bizden elge qaitarý joldaryn tabýdy talap etti", - dedi ministr.
Úshinshi shart - Koreiaǵa jumysqa baratyn qazaqstandyqtar sertifikattaýdan ótýi tiis eken.
"Biz úsh óńirde arnaiy ortalyqtar daiyndadyq. Koreia ókilderi Almatyǵa kelip, ol ortalyqty aralap kórdi. Bizdiń tarapymyzdan barlyq shart oryndaldy. Endi sál kútsek bolǵany. Bul rette zańsyz eńbek migranttaryna readmissiia rásimi qoldanylatyn bolady. Bul - qazirdiń ózinde SIM qaraýyndaǵy másele. Eger olar óz erkimen bilet satyp alyp, Otanyna oralsa, olar eshqandai ákimshilik nemese quqyqtyq jaýapkershilikke tartylmaidy. Biraq, eger olar bulai jasamasa, zańdy túrde jaýapkershilikke tartylady. Jazaǵa qatysty mende naqty málimetter joq", dep túsindirdi Jaqypova.
Buǵan deiin eńbek ministrligi zeinetaqy aýdarymy men jalaqy arasyndaǵy úlken aiyrmaǵa alańdaýly ekenin jazǵanbyz.
