وڭتۇستىك كورەيا قازاقستانعا 15 مىڭ زاڭسىز ميگرانتىن قايتارىپ الۋ جولىن قاراستىرۋدى تالاپ ەتتى. بۇل تۋرالى 14 قازاندا ءماجىلىس دالىزىندە جۋرناليستەرگە بەرگەن سۇقباتىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى، دەپ حابارلايدى Dalanews.kz.

"زاڭدى ەڭبەكپەن قامسىزداندىرۋ جونىندەگى كەلىسىم بويىنشا ءبىزدىڭ تاراپ قۇجاتتارعا قول قويىپ، ءسىم ارقىلى وڭتۇستىك كورەياعا جولداپ قويدى. ەندى ونى سول ەلدىڭ مەملەكەتتىك ورگاندارى قارايدى. ولار بىزگە ءۇش شارت قويىپ وتىر. بىرىنشىدەن، ءبىزدىڭ وڭتۇستىك كورەياداعى ەلشىلىگىمىزدە جۇمىسقا ورنالاستىرۋ جونىندەگى اتتاشە لاۋازىمى قۇرىلۋى كەرەك. ەكىنشىدەن، وندا زاڭسىز جۇرگەن 15 مىڭعا جۋىق وتانداسىمىزدى كورەي تاراپى بىزدەن ەلگە قايتارۋ جولدارىن تابۋدى تالاپ ەتتى"، - دەدى مينيستر.

ءۇشىنشى شارت - كورەياعا جۇمىسقا باراتىن قازاقستاندىقتار سەرتيفيكاتتاۋدان ءوتۋى ءتيىس ەكەن.

"ءبىز ءۇش وڭىردە ارنايى ورتالىقتار دايىندادىق. كورەيا وكىلدەرى الماتىعا كەلىپ، ول ورتالىقتى ارالاپ كوردى. ءبىزدىڭ تاراپىمىزدان بارلىق شارت ورىندالدى. ەندى ءسال كۇتسەك بولعانى. بۇل رەتتە زاڭسىز ەڭبەك ميگرانتتارىنا رەادميسسيا ءراسىمى قولدانىلاتىن بولادى. بۇل - ءقازىردىڭ وزىندە ءسىم قاراۋىنداعى ماسەلە. ەگەر ولار ءوز ەركىمەن بيلەت ساتىپ الىپ، وتانىنا ورالسا، ولار ەشقانداي اكىمشىلىك نەمەسە قۇقىقتىق جاۋاپكەرشىلىككە تارتىلمايدى. ءبىراق، ەگەر ولار بۇلاي جاساماسا، زاڭدى تۇردە جاۋاپكەرشىلىككە تارتىلادى. جازاعا قاتىستى مەندە ناقتى مالىمەتتەر جوق"، دەپ ءتۇسىندىردى جاقىپوۆا.

بۇعان دەيىن ەڭبەك مينيسترلىگى زەينەتاقى اۋدارىمى مەن جالاقى اراسىنداعى ۇلكەن ايىرماعا الاڭداۋلى ەكەنىن جازعانبىز.