Eńbek jáne halyqty áleýmettik qorǵaý ministrligi Óskemendegi «Qaztsink» zaýytynda bolǵan jarylystyń naqty sebebin anyqtap jatyr, dep habarlaidy dalanews.kz.
Bul týraly Senat kýlýarynda vedomstvonyń birinshi vitse ministri Erbol Týiaqbaev málimdedi.
Onyń aitýynsha, qazirgi ýaqytta arnaiy komissiia birneshe nusqany tekserip jatyr.
«Qazir naqty sebebin anyqtap jatyrmyz. Bul qaýipsizdik tehnikasynyń saqtalmaýynan boldy ma, álde qyzmetkerge qaýipsizdik talaptary durys túsindirilmedi me, nemese kásiporyndaǵy tehnologiialyq aqaý ma, ne eskirgen jabdyq ýaqytynda aýystyrylmaǵan ba — sonyń bárin anyqtaimyz. Sebebi belgili bolǵannan keiin mindetti túrde jaýapkershilik bolady», - dedi Týiaqbaev.
Vitse ministrdiń sózinshe, buǵan deiin «Qaztsink» pen basqa da iri óndiris oryndary profilaktikalyq tekserýden ótken.
«Ótken jáne onyń aldyndaǵy jyldary “Qaztsink” pen basqa da iri kásiporyndarǵa tekserý júrgizilgen. Belgili bir nusqamalar berildi. Biraq olar ýaqytynda oryndalǵandyqtan, aiyppul salynbaǵan edi», - dedi ol.
Sonymen qatar qazirgi jaǵdaiǵa bailanysty arnaiy tergeý jedel toby qurylǵan.
Onyń quramyna memlekettik eńbek inspektsiiasy men Tótenshe jaǵdailar ministrliginiń ókilderi kirgen.
Eske salaiyq, buǵan deiin Óskemendegi «Qaztsink» kásipornynda jarylys bolyp, adam shyǵyny tirkelgeni habarlanǵan edi. Oqiǵadan keiin óndiristegi qaýipsizdik máselesi qoǵamda qaitadan qyzý talqylana bastady.
