Baǵdarlamanyń ekinshi baǵyty sheńberinde biylǵy jyly 3,4 mlrd teńge kóleminde qarjy bólindi. Baǵdarlama aiasynda shaǵyn nesie alǵan jáne grant utyp alǵandar arasynda qapshaǵailyqtar da bar. Búginde Qapshaǵaidyń 30-dan astam turǵyny osyndai kómekke qol jetkizip, kásibin bastaǵan.
Solardyń qatarynda konditerlik ónerge burynnan beiimi bar, túrli sheberlik saǵattaryna qatysyp, mashyǵyn jetildirgen qapshaǵailyq 25 jasar ana Gúlnur Zadash da bar. Ol osy «Eńbek» baǵdarlamasyna qatysyp, 200 ailyq eseptik kórsetkish, iaǵni 555 600 teńge kóleminde grant utyp aldy. Konditerlik iske kerekti qural-jaraqtaryn, as úi kombainyn satyp alǵan.
– Meniń kishkentai balam bar. Sondyqtan maǵan úide otyryp jumys istegen qolaily. Memlekettiń qoldaýymen konditerlik isti bastaý arqyly men soǵan qol jetkizdim. «Bastaý Biznes» kýrsynda bizdi biznesti bastaý, damytý jáne nátijesin kórý, ainalymdaǵy aqshany esepteý siiaqty kásipkerlik negizderine úiretti. Qazir konditerler óte kóp, báselestik te úlken. Sondyqtan únemi óz sheberligińdi jetildirip, damytyp otyrýyń kerek, – deidi G.Zadash.
Jas kásipkerdiń torttary, rýletteri jáne basqa da konditerlik ónimderi Qapshaǵaidaǵy «Semerka» dúkeninde turaqty saýdalanady.
Sol siiaqty «Eńbek» memlekettik baǵdarlamasy sheńberinde jańa biznes-ideiasyn iske asyrǵan qapshaǵailyq Madina Quljabaeva da «Bastaý Biznes» kásipkerlik negizderin oqyp, sertifikat aldy. Sonyń negizinde «Halyqqa tsifrlyq qyzmet kórsetý salonyn uiymdastyrý» baǵytynda óz jobasyn qorǵap, 555 600 teńge grant ielendi. M. Quljabaeva osy qarajatqa isin bastaýǵa qajetti noýtbýk, printer, ústel, oryndyqtar satyp aldy. Qazirgi tańda Qapshaǵai qalasynda «Sandyq qyzmetter salonyn» ashyp, halyqqa qyzmet kórsetýde.
– Qazir tsifrlyq dáýir. Sondyqtan zamannyń suranysyn zerttei kele, men halyqqa tsifrlyq jaǵynan qyzmet kórsetý tiimdi dep sheshtim. Osy qyzmetke júginetin turǵyndar barshylyq. Isim aqyryndap alǵa basyp keledi, – deidi M.Quljabaeva.
Atap ótsek, «Eńbek» baǵdarlamasynyń ekinshi baǵyty boiynsha shaǵyn nesie jáne nesieler men shaǵyn nesielerdi kepildendirýdi ulǵaitý mindetin júzege asyrý úshin Almaty oblysynda 2021 jyly 3 319,2 mln teńge qarastyryldy, sonyń 239,2 mln teńgesi qalalar men monoqalalarǵa, al 3080,0 mln teńge aýyldyq jerlerge shaǵyn nieselerge bólindi. Ótken jyly baǵdarlama aiasynda 4791,3 mln. teńge somasyna 1104 shaǵyn nesie berilip, 1525 jumys orny qurylǵan.
Eske salsaq, 2021 jyldyń 1 sáýirindegi málimet boiynsha Almaty oblysynda 123 290 shaǵyn jáne orta biznes sýbektisi jumys isteidi. Bul 2020 jylmen salystyrǵanda 1,6% ulǵaiǵan. Shaǵyn jáne orta bizneste 263,6 myń eńbek etedi.
