Elshi Hamzaev «bárine túsinikti bolsyn» dep oryssha sóiledi
Shara barsynda «Qazaqstan» telearnasynyń jýrnalisi Eýropalyq odaqtyń Qazaqstanǵa, sondai-aq Eýraziialyq ekonomikalyq odaqqa kózqarasy jaiynda suraǵan edi. Sonymen qatar, jýrnalist Elshiniń buǵan deiin resmi tilde aitqan aqparatyn memlekettik tilde qaitalap berýdi ótindi.
Alaida elshi Hamzaev «barlyǵyna birdei túsinikti bolsyn» degen jeleýmen aqparatynyń bárin qaitadan orys tilinde aityp shyqty. Budan soń, telejýrnalist Elshiden qosymsha bir-eki aýyz sózdi memlekettik tilde jetkizýdi taǵy da surady. Degenmen, Hamzaev myrza ony durys túsinbegen bolýy kerek. «Biz bul jerde meniń qazaq tilin bilý deńgeiimdi tekserý úshin jinalmaǵan shyǵarmyz» dedi. Sosyn ol qajet bolsa, memlekettik tilde bólek suxbat berýge daiyn ekenin de aityp qaldy.
Osy máselege orai, QazAqparat tilshisi elshi Hamzaevqa «bólek» jolyǵyp, jýrnalistiń efirge qajetti aqparatyn memlekettik tilde ne úshin bermegenin túsindirip berýdi suraǵan bolatyn. «Iá, iá, men ony (memlekettik tildegi aqparattyń efirge qajet ekenin - avt.) túsindim. Meniń aitqanym, osynda otyrǵan jýrnalisterdiń kóbisi orys tilinde suraq qoiyp, orys tilinde jaýap berip otyr. Jýrnalisterdiń bári túsinsin dep, bir tilde sóilegenimiz jón dep sanadym. Biraq, memlekettik tilde de aqparat qajet ekenin sońynan túsindim. Qarsylyǵym joq, memlekettik tilde aityp beremin. Endigi joly osy jaǵyn naqtylap aityp beremin. Keleside eskeremin», – dedi elshi Hamzaev.
