Elordada jazǵy demalys «Qazaqstan balalary – jazdy qýanyshpen qarsy alady!» atty uranymen ótedi. Jazǵy kezeńde balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrý memlekettiń áleýmettik saıasatynyń ajyramas bóligi jáne balalardyń shyǵarmashylyq damýy úshin múmkindik bolyp sanalady. Bul týraly onlaın brıfıńte Bilim basqarmasy basshysynyń orynbasary Rımma Imanǵazınova málim etti, – dep habarlaıdy Dalanews.kz Nur-Sultan ákimdiginiń resmı saıtyna silteme jasap.

Rımma Imanǵazınovanyń aıtýynsha, jaz mezgilinde qala syrtyndaǵy myna lagerlerdiń jumysy jandandyrylady:

- 240 oryndyq «ARMAN» týrısik-saýyqtyrý kesheni;

- 160 oryndyq «Borovıchok» saýyqtyrý lageri.

«Atalǵan lagerler qaladan 100 shaqyrym jerde, ıaǵnı Aqmola oblysynda ornalasqan. Sanıtarlyq normalardy saqtaı otyryp, 10 kúnnen 5 aýysym ótkizý josparlanyp otyr. Lagerler 7 maýsymnan 10 tamyzǵa deıin uıymdastyrylady.

Shtattyq qyzmetkerler – tálimgerler, tárbıeshiler, medısınalyq qyzmetkerler, aspazdar, tehnıkalyq qyzmetkerler quryldy», - dedi ol.

Sondaı-aq, ál-Farabı jáne Mahambet Ótemisuly atyndaǵy oqýshylar saraıynyń bazalarynda sanıtarlyq normalardy saqtaı otyryp balalardyń jazǵy demalysyn uıymdastyrý josparlanýda. Biraq as-sýy qamtamasyz etilmeıdi.

Týyndaǵan suraqtar boıynsha Bilim basqarmasynyń Call-ortalyǵyna 55-68-51 telefony boıynsha habarlasyp bile alasyz.