– Elordada mektep salý úshin 72 jer telimi belgilendi. Bul jer ýchaskeleriniń aýmaǵy 120 myń oqýshy ornyna (eki aýysymda 240 myń oqýshy orny) arnalǵan oqý oryndaryn salýǵa múmkindik beredi. – dedi qala basshysy.
Atalmysh jer ýchaskeleri áleýmettik nysandarǵa degen qajettilikti eskere otyryp anyqtalǵan. Jer telimderi qalanyń barlyq aýdanynda ornalasqan.
Elordada áleýmettik nysandardy salýǵa arnalǵan jer ýchaskeleriniń sany jyl saıyn artyp keledi. Árbir aýdanda (shaǵyn aýdandarda) oqý oryndary bolýy úshin egjeı-tegjeıli josparlaý jobasyna arnaıy baǵyt bekitilgenin ákim tilge tıek etti.
Elordada bıyl 11 mektep salynyp, paıdalanýǵa beriledi. Esil aýdanynda – 6 mektep, Almaty aýdanynda – 4 mektep, Saryarqa aýdanynda – taǵy 1 mektep, Baıqońyr aýdanynda – 1 mektep (ol 2023 jyly tapsyrylady). Atalǵan bilim ordalary arqyly 23 myńnan astam oqýshyǵa arnalǵan oryn ashylady.
– Aldaǵy 2023 jyly taǵy 13 mektep salyp, paıdalanýǵa berýdi josparlap otyrmyz. Osylaısha taǵy 22 myńǵa jýyq oqýshy orny ashylady. Esil aýdanynda – taǵy 8 mektep (aýdanda turǵyndar tyǵyz ornalasqanyn eskere otyryp), Almaty aýdanynda – 4 mektep, Baıqońyr aýdanynda – 1 mektep. Sol sıaqty mektep sanyn arttyrý, onyń ishinde jeke qarajat esebinen de kóbeıtý máselesin qarastyramyz, – dedi Altaı Kólginov.
Memleket basshysynyń tapsyrmasy boıynsha elordada 3 jyl ishinde 34 mektep salynýy tıis. Bul – 70 myń oqýshy ornyn ashýǵa múmkindik berdi.
