– ەلوردادا مەكتەپ سالۋ ءۇشىن 72 جەر تەلىمى بەلگىلەندى. بۇل جەر ۋچاسكەلەرىنىڭ اۋماعى 120 مىڭ وقۋشى ورنىنا (ەكى اۋىسىمدا 240 مىڭ وقۋشى ورنى) ارنالعان وقۋ ورىندارىن سالۋعا مۇمكىندىك بەرەدى. – دەدى قالا باسشىسى.
اتالمىش جەر ۋچاسكەلەرى الەۋمەتتىك نىساندارعا دەگەن قاجەتتىلىكتى ەسكەرە وتىرىپ انىقتالعان. جەر تەلىمدەرى قالانىڭ بارلىق اۋدانىندا ورنالاسقان.
ەلوردادا الەۋمەتتىك نىسانداردى سالۋعا ارنالعان جەر ۋچاسكەلەرىنىڭ سانى جىل سايىن ارتىپ كەلەدى. ءاربىر اۋداندا (شاعىن اۋدانداردا) وقۋ ورىندارى بولۋى ءۇشىن ەگجەي-تەگجەيلى جوسپارلاۋ جوباسىنا ارنايى باعىت بەكىتىلگەنىن اكىم تىلگە تيەك ەتتى.
ەلوردادا بيىل 11 مەكتەپ سالىنىپ، پايدالانۋعا بەرىلەدى. ەسىل اۋدانىندا – 6 مەكتەپ، الماتى اۋدانىندا – 4 مەكتەپ، سارىارقا اۋدانىندا – تاعى 1 مەكتەپ، بايقوڭىر اۋدانىندا – 1 مەكتەپ (ول 2023 جىلى تاپسىرىلادى). اتالعان ءبىلىم وردالارى ارقىلى 23 مىڭنان استام وقۋشىعا ارنالعان ورىن اشىلادى.
– الداعى 2023 جىلى تاعى 13 مەكتەپ سالىپ، پايدالانۋعا بەرۋدى جوسپارلاپ وتىرمىز. وسىلايشا تاعى 22 مىڭعا جۋىق وقۋشى ورنى اشىلادى. ەسىل اۋدانىندا – تاعى 8 مەكتەپ (اۋداندا تۇرعىندار تىعىز ورنالاسقانىن ەسكەرە وتىرىپ)، الماتى اۋدانىندا – 4 مەكتەپ، بايقوڭىر اۋدانىندا – 1 مەكتەپ. سول سياقتى مەكتەپ سانىن ارتتىرۋ، ونىڭ ىشىندە جەكە قاراجات ەسەبىنەن دە كوبەيتۋ ماسەلەسىن قاراستىرامىز، – دەدى التاي كولگىنوۆ.
مەملەكەت باسشىسىنىڭ تاپسىرماسى بويىنشا ەلوردادا 3 جىل ىشىندە 34 مەكتەپ سالىنۋى ءتيىس. بۇل – 70 مىڭ وقۋشى ورنىن اشۋعا مۇمكىندىك بەردى.
