Memleket basshysy Qasym-Jomart Toqaev kómir baǵasyn kótermeýge jáne deldaldardyń kómir kompaniialarymen kelisip sybailasyp ketýine jol bermeýge tapsyrma bergen bolatyn.
«Bek-Aida» JK satý menedjeri Dýlat Qusaiynov atap ótkendei, kómir satý oryndarda jetispeýshilikter bolmaǵan.
– Kómir satý kompaniialary men ákimdiktiń kómirdi aldyn-ala satyp alý týraly ýaqtyly júrgizilgen aqparattyq jumysynyń arqasynda eshqandai dúrligý men uzyn-sonar kezek bolǵan joq. Turǵyndar kómirdi jazda satyp ala bastady. Qazir de kelip jatyr, kóbisi alǵashqy qarǵa deiin satyp alǵan. Baǵalar bekitilgen, – dedi D.Qusaiynov.
«iKomek109» qalalyq monitoring jáne jedel áreket etý ortalyǵy janynda qaýyrt jeli quryldy. Onda ár turǵyn satý oryndaǵy kómirdiń bar-joǵy, qansha qory baryn, baǵasy men túrleri týraly bile alady. Sondai-aq, qaladaǵy kómirge qatysty aqparat qalalyq jáne aýdandyq ákimdikterdiń resmi saittary men áleýmettik jelilerinde jariialanyp otyrady.
