Elordada 1 qyrkúıekten 1 qarashaǵa deıin halyqty alǵashqy medısınalyq-sanıtarıalyq kómek (BMSK) uıymdaryna tirkeý naýqany ótedi. Bul ár turǵynǵa bir ákimshilik-aýmaqtyq birlik sheginde (jaıaý jetý qashyqtyǵynda) polıklınıkany erkin tańdaý quqyǵyn qamtamasyz etý jáne medısınalyq uıymdarǵa resýrstardy aldyn ala josparlap, kelesi jyly tirkelgen halyqqa sapaly qyzmet kórsetý úshin júrgiziledi,- dep habarlaıdy Dalanews.kz
Tirkeý halyqqa tegin medısınalyq kómektiń kepildik berilgen kólemi (TMKKK) jáne mindetti áleýmettik medısınalyq saqtandyrý (MÁMS) júıesi aıasynda qyzmetterge qol jetkizýdi qamtamasyz etedi.
Azamattar emhanaǵa tirkelýin elektrondyq úkimet portaly eGov.kz arqyly nemese qalalyq iKomek 109 qoldaý qyzmeti arqyly teksere alady.
Tirkelýge quqyǵy barlar:
• Qazaqstan Respýblıkasynyń azamattary, qandastar, bosqyndar jáne turýǵa yqtıarhaty bar sheteldikter – TMKKK jáne MÁMS aıasynda medısınalyq kómek alýǵa quqyly;
• Ýaqytsha kelgen sheteldikter men azamattyǵy joq adamdar – erikti (EMS) nemese mindetti medısınalyq saqtandyrý (MMS) sharty/polısi negizinde ne zań talaptaryna sáıkes;
• EAEO elderinen (Reseı, Belarýs, Qyrǵyzstan, Armenıa) kelgen eńbek mıgranttary jáne olardyń otbasylary – EMS/MMS bolǵan jaǵdaıda;
• 18 jastan asqan stýdentter – óz betinshe tirkeledi;
• Kámeletke tolmaǵandar – zańdy ókilderiniń (ata-analar, qorǵanshylar, qamqorshylar) ótinishi boıynsha;
• Júkti áıelder men 5 jasqa deıingi balalar – naqty turatyn jeri boıynsha AMSK uıymdaryna tirkeledi;
• Zeınetkerler men múgedektigi bar adamdar – tikeleı emhanada ótinish bere alady;
• Bala kezinen múgedekterdiń zańdy ókilderi, patronattyq tárbıelenýshiler – rastaıtyn qujattar negizinde;
• Merzimdi áskerı qyzmettegiler – dıslokasıa orny boıynsha, sottalǵandar – jazasyn óteý orny boıynsha.
Tirkelý tártibi:
1. eGov.kz portaly arqyly. Avtorızasıadan ótip, elektrondyq ótinim toltyryńyz. Nátıje nemese dáleldi bas tartý 1 jumys kúni ishinde jeke kabınetke jiberiledi.
2. Tańdalǵan emhanada jeke ózi. Jeke kýálikti kórsetip, uıym basshysynyń atyna ótinish toltyrylady.
3. Halyqqa qyzmet kórsetý ortalyqtary (HQKO) arqyly.
Mańyzdy: tirkelý JSN boıynsha jáne tek bir ǵana BMSK uıymyna júrgiziledi. Eger siz emhanańyzdy ózgertpeseńiz, jańa ótinim berýdiń qajeti joq: qazirgi uıymyńyzda tirkeýde qala beresiz.
Naýqan barysynda tirkelgen tulǵalar tańdalǵan medısınalyq uıymnan qyzmetti 2026 jylǵy 1 qańtardan bastap ala bastaıdy. Osy jyldyń sońyna deıin qyzmet burynǵy emhanada jalǵasady.
Tirkeýden bas tartý negizderi:
• Durys emes derekterdiń berilýi;
• Bir jalpy tájirıbe dárigerine, ýchaskelik terapevtke nemese ýchaskelik pedıatrǵa tirkelgen pasıentterdiń ruqsat etilgen sanynan asyp ketý;
• Balalarǵa nemese qamqorlyqtaǵy adamdarǵa qatysty zańdy ókildikti rastaıtyn qujattardyń bolmaýy;
• Jeke derekterge shekteýli qoljetimdilikke kelisimniń bolmaýy.
Qosymsha túsiniktemeler alýǵa bolady:
• Emhanańyzdyń tirkeý bóliminen;
• Astana qalasynyń Qoǵamdyq densaýlyq saqtaý basqarmasynan;
• 1414 baılanys ortalyǵy, Qoldau 24/7 mobıldi qosymshasy, fms.kz saıty, Telegram-daǵy SaqtandyryBot;
• iKomek 109 qalalyq qoldaý qyzmeti.
