Erekshe múmkindigi bar 220 bala sporttyń 5 túrinen jarysty. Sportshylar elordaǵa Qazaqstan men Reseıdiń túrli óńirlerinen kelgenin aıta ketýimiz kerek.
Balalar paralımpıadalyq oıyndary «erekshe» balalar arasynda beıimdelgen sporttyń – bochcha, para ústel tenısi, para taekvondo, para karate jáne para chırlıdıng boıynsha synǵa tústi.
Bul rette chırlıdıng alǵash ret ınklúzıvti jarystar baǵdarlamasyna engizilgenin aıta ketken jón. İs-sharany «Samruk-Kazyna Trust» áleýmettik jobalardy damytý qorynyń qoldaýymen «Teń múmkindikter álemi» múgedek balalardyń ata-analar qoǵamy» QB uıymdastyrdy.
Balalar paralımpıadalyq oıyndaryna beıimdelgen sport boıynsha mentaldy buzylystary, BSP, Daýn sındromy bar balalar, sondaı-aq onkologıany jeńgen jas sportshylar qatysty.
Anar Almasova – úsh «erekshe» balanyń anasy. Úlken uly Arystanbek 17 jasta, al Narıman – 13 jasta. Ekeýinde de mentaldy buzylýlar bar. Jyl saıyn olar bochcha jáne taekvondomen shuǵyldanyp, túrli jarystarǵa qatysyp keledi.
– Sporttyń arqasynda meniń balalarym fızıkalyq jaǵynan ǵana emes, sonymen qatar zıatkerlik jaǵynan da damyp keledi. Ulym Narıman óte uzaq ýaqyt sóıleı almady, biraq ol beıimdelgen dene shynyqtyrýmen aınalysa bastaǵannan keıin kitapqa qyzyǵýshylyq tanytyp, býyndardy oqı alatyn boldy. Qazir ulym burynǵydan shydamdyraq, – deıdi Anar Almasova.
Beıimdelgen sport búgingi tańda erekshe qajettilikteri bar balalardyń qımyl-qozǵalys buzylystaryn túzetýdiń, fızıkalyq damýyn yntalandyrý úshin qajet. Qazir elimizde ınklúzıvti sport seksıalary ashylyp, «erekshe» balalarǵa dene shynyqtyrýdy oqytý ádistemesi ázirlenip jatyr.
