نۇر-سۇلتان قالاسىندا «دەنە مۇمكىندىكتەرى شەكتەۋلى ادامدارعا ارنالعان پاراليمپيادالىق جاتتىعۋ ورتالىعى» مەن «تارلان» مۇز ايدىنىنىڭ قىزمەتىن ۇيىمداستىرۋ  مەملەكەتتىك-جەكە مەنشىك ارىپتەستىك جوباسىن ىسكە اسىرۋ شەڭبەرىندە العاش رەت بالالار اراسىندا پاراليمپيادا ويىندارى ءوتتى، دەپ حابارلايدى قالا اكىمدىگىنىڭ رەسمي سايتى.

ەرەكشە مۇمكىندىگى بار 220 بالا سپورتتىڭ 5 تۇرىنەن جارىستى. سپورتشىلار ەلورداعا قازاقستان مەن رەسەيدىڭ ءتۇرلى وڭىرلەرىنەن كەلگەنىن ايتا كەتۋىمىز كەرەك.

بالالار پاراليمپيادالىق ويىندارى «ەرەكشە» بالالار اراسىندا بەيىمدەلگەن سپورتتىڭ – بوچچا، پارا ۇستەل تەننيسى، پارا تاەكۆوندو، پارا كاراتە جانە پارا چيرليدينگ بويىنشا سىنعا ءتۇستى.

بۇل رەتتە چيرليدينگ العاش رەت ينكليۋزيۆتى جارىستار باعدارلاماسىنا ەنگىزىلگەنىن ايتا كەتكەن ءجون. ءىس-شارانى «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن «تەڭ مۇمكىندىكتەر الەمى» مۇگەدەك بالالاردىڭ اتا-انالار قوعامى» قب ۇيىمداستىردى.

بالالار پاراليمپيادالىق ويىندارىنا بەيىمدەلگەن سپورت بويىنشا مەنتالدى بۇزىلىستارى، بسپ، داۋن سيندرومى بار بالالار، سونداي-اق ونكولوگيانى جەڭگەن جاس سپورتشىلار قاتىستى.

انار الماسوۆا – ءۇش «ەرەكشە» بالانىڭ اناسى. ۇلكەن ۇلى ارىستانبەك 17 جاستا، ال ناريمان – 13 جاستا. ەكەۋىندە دە مەنتالدى بۇزىلۋلار بار. جىل سايىن ولار بوچچا جانە تاەكۆوندومەن شۇعىلدانىپ، ءتۇرلى جارىستارعا قاتىسىپ كەلەدى.

– سپورتتىڭ ارقاسىندا مەنىڭ بالالارىم فيزيكالىق جاعىنان عانا ەمەس، سونىمەن قاتار زياتكەرلىك جاعىنان دا دامىپ كەلەدى. ۇلىم ناريمان وتە ۇزاق ۋاقىت سويلەي المادى، ءبىراق ول بەيىمدەلگەن دەنە شىنىقتىرۋمەن اينالىسا باستاعاننان كەيىن كىتاپقا قىزىعۋشىلىق تانىتىپ، بۋىنداردى وقي الاتىن بولدى. ءقازىر ۇلىم بۇرىنعىدان شىدامدىراق، – دەيدى انار الماسوۆا.

بەيىمدەلگەن سپورت بۇگىنگى تاڭدا ەرەكشە قاجەتتىلىكتەرى بار بالالاردىڭ قيمىل-قوزعالىس بۇزىلىستارىن تۇزەتۋدىڭ، فيزيكالىق دامۋىن ىنتالاندىرۋ ءۇشىن قاجەت. ءقازىر ەلىمىزدە ينكليۋزيۆتى سپورت سەكسيالارى اشىلىپ، «ەرەكشە» بالالارعا دەنە شىنىقتىرۋدى وقىتۋ ادىستەمەسى ازىرلەنىپ جاتىر.