Elordada Abaı Qunanbaıulynyń 177 jyldyǵyna arnalǵan kitap kórmesi ashyldy

Dalanews 10 tam. 2022 12:20 771

Nur-Sultanda Abaı Qunanbaıulynyń 177 jyldyǵyna arnalǵan kórme ashyldy. Qala turǵyndary aqynnyń poetıkalyq jáne fılosofıalyq murasyn, abaıtanýshy ǵalymdardyń eńbekterin jáne uly oıshyldyń shyǵarmalarynyń aýdarmalaryn oqyp shyqty.

Kórmege aqynnyń 50-den astam kitaby qoıyldy.

– Abaıdyń ádebı eńbekteri ylǵı da dúken men kitaphana sóreleriniń tórinde ornalasady. Aqynnyń shyǵarmalary Qazaqstannan tys jerlerde de tanymal. Bul jerden qundy kitaptardy tabýǵa bolady. Arasynda Anatolıı Kım aýdarǵan aqynnyń «Qara sózderi», Muhtar Áýezovtiń «Abaı joly» romany, Teımýr Ataevtyń «Abaıdyń ulylyǵy nemese XXI ǵasyrdaǵy oıshyldyń portretin jasaýǵa talpynys», Qulmat Ómirálıevtiń «Abaı aforızmi», Dúkenbaı Dosjannyń «Abaıdyń rýhy» sekildi kitaptar bar. Oqyrmandar osy jáne ózge de kitaptardy kitaphana zalynda otyryp oqýǵa nemese ózimen birge úıine alyp ketýine bolady. Bizdiń kitaphanashylar kún saıyn áleýmettik jelilerde post jazyp, jańa basylymdar týraly habardar etedi, – dedi kitaphanashy Anar Ákimbekova.

Sonymen qatar oqýshylar kórmede óleń oqyp, án shyrqady, al jurtshylyq Abaıdyń shyǵarmashylyq jolynyń basty kezeńderi týraly bilimin arttyrdy.

– Men «Segizaıaq» óleńin oqydym, onda avtor adamnyń boıyndaǵy jaman qasıetterdi áshkereleıdi. Abaıdyń shyǵarmashylyǵyn zertteýden lázzat alamyn. Onda adamnyń ózin-ózi damytý týraly tereń oılar qamtylǵan. Sondaı-aq aqynnyń fılosofıalyq shyǵarmalarynda alǵa umtylý, Otanǵa degen súıispenshilik dáripteledi, – dep qorytyndylady mektep oqýshysy Aıǵanym Satan.

Usynylǵan
Sońǵy jańalyqtar