Búginde jaǵdai qalai órbip jatqany týraly úsh qalanyń ókilderi jaýap berdi.
«Nur-Sultan qalasynda 14-29 jas aralyǵyndaǵy 245 myńnan asa jas azamat bar. Osy baǵdarlamaǵa sáikes jyl sońyna deiin jastarǵa 1050 páter berý qarastyrylǵan.
Dál qazirgi ýaqytta osy páterlerdiń konkýrstyq qujattary daiyndalyp jatyr. Jospar boiynsha qarasha aiynan bastap qujattar qabyldanady. Ol úshin arnaiy bir jerge baryp kezekke turýdyń qajeti joq. Qujattardy qabyldaý Smart Astana platformasynda tolyǵymen elektrondy túrde ótedi. Ony ýaqyty jaqyndaǵanda taǵy da habardar etemiz», - dedi Nur-Sultan qalasy ákimdiginiń Qoǵamdyq damý isteri basqarmasynyń basshysy Talǵat Rahmanberdi.
Osydan keiin bailanysqa shyqqan Almaty qalasy Turǵyn úi saiasaty basqarmasy basshysynyń orynbasary Aibek Seidildaev beinebailanysqa shyǵyp jaǵdaidy qysqasha túsindirip berdi.
«Búginde atalǵan baǵdarlama boiynsha daiyndyq jumystary júrgizildi. Biz de ony elektrondy túrde daiyndap jatyrmyz. Qyrkúiek aiynyń sońynda Turǵyn úi basqarmasynyń saitynda jariialaimyz. Eshqaida barýdyń qajeti joq. Elektrondy tsifrly qoltańba kilti arqyly saitta qabyldaimyz», - dedi Aibek Seidildaev.
Óz kezeginde Shymkent qalasy ákiminiń orynbasary Nursadyq Ergeshbek bul baǵdarlama boiynsha júrgizilip jatqan jumystardy bylaisha túsindirip berdi.
«Shymkent qalasynda 260 myńnan astam jas bar. Bul baǵdarlamaǵa niet bildirip jatqandar óte kóp. Qazir qurylysy bastalyp ketti. Jyl sońyna deiin aiaqtaý josparlanyp otyr.
Biz de qarasha aiynda ákimdik saitynda habarlandyrý beretin bolamyz. Qajet málimettiń de bári saitymyzda kórsetiledi. Daiyndyq tolyq júrip jatyr», - dep qysqa qaiyrdy Nursadyq Ergeshbek.
