بٷگٸندە جاعداي قالاي ٶربٸپ جاتقانى تۋرالى ٷش قالانىڭ ٶكٸلدەرٸ جاۋاپ بەردٸ.
«نۇر-سۇلتان قالاسىندا 14-29 جاس ارالىعىنداعى 245 مىڭنان اسا جاس ازامات بار. وسى باعدارلاماعا سەيكەس جىل سوڭىنا دەيٸن جاستارعا 1050 پەتەر بەرۋ قاراستىرىلعان.
دەل قازٸرگٸ ۋاقىتتا وسى پەتەرلەردٸڭ كونكۋرستىق قۇجاتتارى دايىندالىپ جاتىر. جوسپار بويىنشا قاراشا ايىنان باستاپ قۇجاتتار قابىلدانادى. ول ٷشٸن ارنايى بٸر جەرگە بارىپ كەزەككە تۇرۋدىڭ قاجەتٸ جوق. قۇجاتتاردى قابىلداۋ Smart Astana پلاتفورماسىندا تولىعىمەن ەلەكتروندى تٷردە ٶتەدٸ. ونى ۋاقىتى جاقىنداعاندا تاعى دا حاباردار ەتەمٸز», - دەدٸ نۇر-سۇلتان قالاسى ەكٸمدٸگٸنٸڭ قوعامدىق دامۋ ٸستەرٸ باسقارماسىنىڭ باسشىسى تالعات راحمانبەردٸ.
وسىدان كەيٸن بايلانىسقا شىققان الماتى قالاسى تۇرعىن ٷي ساياساتى باسقارماسى باسشىسىنىڭ ورىنباسارى ايبەك سەيدٸلداەۆ بەينەبايلانىسقا شىعىپ جاعدايدى قىسقاشا تٷسٸندٸرٸپ بەردٸ.
«بٷگٸندە اتالعان باعدارلاما بويىنشا دايىندىق جۇمىستارى جٷرگٸزٸلدٸ. بٸز دە ونى ەلەكتروندى تٷردە دايىنداپ جاتىرمىز. قىركٷيەك ايىنىڭ سوڭىندا تۇرعىن ٷي باسقارماسىنىڭ سايتىندا جارييالايمىز. ەشقايدا بارۋدىڭ قاجەتٸ جوق. ەلەكتروندى تسيفرلى قولتاڭبا كٸلتٸ ارقىلى سايتتا قابىلدايمىز», - دەدٸ ايبەك سەيدٸلداەۆ.
ٶز كەزەگٸندە شىمكەنت قالاسى ەكٸمٸنٸڭ ورىنباسارى نۇرسادىق ەرگەشبەك بۇل باعدارلاما بويىنشا جٷرگٸزٸلٸپ جاتقان جۇمىستاردى بىلايشا تٷسٸندٸرٸپ بەردٸ.
«شىمكەنت قالاسىندا 260 مىڭنان استام جاس بار. بۇل باعدارلاماعا نيەت بٸلدٸرٸپ جاتقاندار ٶتە كٶپ. قازٸر قۇرىلىسى باستالىپ كەتتٸ. جىل سوڭىنا دەيٸن اياقتاۋ جوسپارلانىپ وتىر.
بٸز دە قاراشا ايىندا ەكٸمدٸك سايتىندا حابارلاندىرۋ بەرەتٸن بولامىز. قاجەت مەلٸمەتتٸڭ دە بەرٸ سايتىمىزدا كٶرسەتٸلەدٸ. دايىندىق تولىق جٷرٸپ جاتىر», - دەپ قىسقا قايىردى نۇرسادىق ەرگەشبەك.
