– Ótken aptalarda ádettegidei azamattardy jeke qabyldadym. Osyǵan deiin aitqanymdai, biz problemalardy sheshý isine tek dálme-dál ǵana emes, sol siiaqty júieli deńgeide de qaraýǵa tyrysamyz. Azamattardy qabyldaý kezinde, qala turǵyndarymen kezdesý barysynda kóterilgen máselelerdi negizge aldyq. Nátijesinde infraqurylymdyq damý jospary men halyqtyń jyl saiynǵy ósýin, elorda joldaryna túsetin trafiktiń ulǵaiǵanyn eskere otyryp, 10 jáne odan da kóp jylǵa arnalǵan qalalyq kóliktiń biryńǵai tehnikalyq paiymyn ázirleýge arnalǵan keshendi kólik shemasynyń (KQT) tujyrymdamasyn qabyldadyq, – dedi elorda ákimi.
Osy rette ákimdik usynǵan mospar men tujyrymdamany qalalyq máslihat qoldaǵanyn aita ketýimiz kerek.
– Búgin nóser kárizin salý boiynsha júrgizilip jatqan jumystarǵa tolyǵyraq toqtalyp ótkim keledi. Máselen, ótken jyldyń ózinde biz 130 shaqyrymnan astam nóser kárizi men aryq-naýa júiesin salyp, 146 problemaly ýchaskede sý basý máselesin sheshtik.
Máselen, qalanyń eń problemaly tustarynyń biri – B.Momyshuly dańǵylynda sý basý problemasy sheshildi. Toqtaýsyz jaýǵan jaýyn kezinde kólikterdiń belshesinen sýǵa batatyny, sol siiaqty úrlemeli qaiyqtardyń jurttyń nazaryn aýdarǵany esterińizde bolar. Atalmysh dańǵylǵa nóser káriziniń magistraldy kollektoryn saldyq. Bul kárizdiń uzyndyǵy 500 metrdi quraidy – basy Daýylpaz kóshesinen bastalyp, Elim-ai kóshesine deiin (B.Momyshuly dańǵylyn qiyp ótedi) jalǵasady. Jańa oryn qoldanystaǵy nóser kárizi jelisiniń ótkizý qabiletin 1,5 ese arttyrýǵa múmkindik berdi.
Almaty aýdanynda (Sh.Qaldaiaqov kóshesi), jańa vokzal, Uly Dala dańǵyly boiynda jáne t.b. tustarda nóser káriziniń qurylysyn júrgizip jatyrmyz. Nóser kárizderi men tazartý ǵimaratynyń qurylysy men qýatyn ulǵaitý boiynsha jumystar júieli deńgeide júrgizilip jatyr, – dedi elorda ákimi Altai Kólginov.
