Nurlan Soltambekov Kishi Taldykóldi saqtap jáne sýyn toltyra otyryp, rekreasıalyq aımaq qurý boıynsha jobalaý-smetalyq qujattama ázirleýdi tapsyrdy.
Onda sý aýmaǵy keminde 20 gektar bolmaq. Osylaısha, sý túbin tereńdetý jumystary laı jáne basqa da zıandy shógindilerden tazartýǵa, ortasha tereńdikti arttyrýǵa, sý balansyn saqtaýǵa múmkindik beredi.
Aıta ketý kerek, qazir sýly-batpaqty nysandaǵy negizgi ıondardyń, aýyr metaldardyń, bıogendik zattardyń quramy normadan birneshe ese asady.
Tıisinshe, Kishi Taldykóldi zıandy zattardan tazartý birinshi kezekte jergilikti turǵyndardyń densaýlyǵyna oń áser etedi. Tereńdigi 20 santımterden kem ári qaýipti, batpaqty – Kishi Taldykól mańy qalpyna keltirilip, abattandyrylady. Onda áleýmettik nysandar, ıaǵnı turǵyn úıler, mektepter, medısına ortalyqtary salynady.
Kishi Taldykóldi qalpyna keltirý jumystary akvatorıa qura otyryp, jaǵalaý salýǵa múmkindik beredi: bolashaqta eki jaǵalaýdy jalǵaıtyn kópir salý, qala turǵyndary úshin sý kóligin iske qosý, sondaı-aq flora men faýnasy bar ekoklımatty saqtaý josparlanyp otyr.
Kishi Taldykól sýly-batpaqty nysany aǵyn sýlar jınalǵan oryn bolǵanyn, úlken Taldykól sýymen tabıǵı baılanysy joq ári jerústi aǵyny men jerasty sýlary arqyly ózara baılanyspaıtynyn atap ótken jón.
Taldykóldiń (úlken Taldykól) óziniń ekologıalyq ınfraqurylymy bolady. Taldykól kóliniń janynda qoryq, orman-saıabaq aımaǵy bar elimizdegi alǵashqy tabıǵı park ashylady. Al ekinshi ekopark – Maıbalyq kóliniń mańy (áýejaı baǵyty boıynsha ońtústik-shyǵys jaǵy) tartymdy oryndardyń biri bolmaq.
