كىشى تالدىكول سۋىنىڭ ءتۇبىن تەرەڭدەتۋ جۇمىستارى جۇرگىزىلمەسە، بىرەر جىلدىڭ ىشىندە قۇرعاپ قالۋى مۇمكىن. سەبەبى مۇندا قۇرعاۋ پروسەسى ءجۇرىپ جاتىر. ەلوردا اكىمىنىڭ ورىنباسارى نۇرلان سولتامبەكوۆ جەتەكشىلىك ەتكەن ەكولوگيالىق كەڭەستە كىشى تالدىكولدەگى رەكرەاسيالىق اۋماقتى ساقتاۋ جانە قۇرۋ ماسەلەسى قارالدى، – دەپ حابارلايدى Dalanews.kz.

نۇرلان سولتامبەكوۆ كىشى تالدىكولدى ساقتاپ جانە سۋىن تولتىرا وتىرىپ، رەكرەاسيالىق ايماق قۇرۋ بويىنشا جوبالاۋ-سمەتالىق قۇجاتتاما ازىرلەۋدى تاپسىردى.

وندا سۋ اۋماعى كەمىندە 20 گەكتار بولماق. وسىلايشا، سۋ ءتۇبىن تەرەڭدەتۋ جۇمىستارى لاي جانە باسقا دا زياندى شوگىندىلەردەن تازارتۋعا، ورتاشا تەرەڭدىكتى ارتتىرۋعا، سۋ بالانسىن ساقتاۋعا مۇمكىندىك بەرەدى.

ايتا كەتۋ كەرەك، ءقازىر سۋلى-باتپاقتى نىسانداعى نەگىزگى يونداردىڭ، اۋىر مەتالداردىڭ، بيوگەندىك زاتتاردىڭ قۇرامى نورمادان بىرنەشە ەسە اسادى.

تيىسىنشە، كىشى تالدىكولدى زياندى زاتتاردان تازارتۋ ءبىرىنشى كەزەكتە جەرگىلىكتى تۇرعىنداردىڭ دەنساۋلىعىنا وڭ اسەر ەتەدى. تەرەڭدىگى 20 سانتيمتەردەن كەم ءارى ءقاۋىپتى، باتپاقتى – كىشى تالدىكول ماڭى قالپىنا كەلتىرىلىپ، اباتتاندىرىلادى. وندا الەۋمەتتىك نىساندار، ياعني تۇرعىن ۇيلەر، مەكتەپتەر، مەديسينا ورتالىقتارى سالىنادى.

كىشى تالدىكولدى قالپىنا كەلتىرۋ جۇمىستارى اكۆاتوريا قۇرا وتىرىپ، جاعالاۋ سالۋعا مۇمكىندىك بەرەدى: بولاشاقتا ەكى جاعالاۋدى جالعايتىن كوپىر سالۋ، قالا تۇرعىندارى ءۇشىن سۋ كولىگىن ىسكە قوسۋ، سونداي-اق فلورا مەن فاۋناسى بار ەكوكليماتتى ساقتاۋ جوسپارلانىپ وتىر.

كىشى تالدىكول سۋلى-باتپاقتى نىسانى اعىن سۋلار جينالعان ورىن بولعانىن، ۇلكەن تالدىكول سۋىمەن تابيعي بايلانىسى جوق ءارى جەرۇستى اعىنى مەن جەراستى سۋلارى ارقىلى ءوزارا بايلانىسپايتىنىن اتاپ وتكەن ءجون.

تالدىكولدىڭ (ۇلكەن تالدىكول) ءوزىنىڭ ەكولوگيالىق ينفراقۇرىلىمى بولادى. تالدىكول كولىنىڭ جانىندا قورىق، ورمان-ساياباق ايماعى بار ەلىمىزدەگى العاشقى تابيعي پارك اشىلادى. ال ەكىنشى ەكوپارك – مايبالىق كولىنىڭ ماڭى (اۋەجاي باعىتى بويىنشا وڭتۇستىك-شىعىس جاعى) تارتىمدى ورىنداردىڭ ءبىرى بولماق.