Kúni keshe ǵana ótken referendýmǵa qatysty Qazaqstannyń qoǵamdyq damý institýtynyń sarapshysy Damir Belgibaev óziniń Feisbýk paraqshasynda pikir bildirip, «refrendýmdy elimizdiń energiia qaýipsizdigin nyǵaitýǵa baǵyttalǵan mańyzdy sheshim» dep baǵalapty.
– Memlekettik Ortalyq sailaý komissiiasynyń málimetine sáikes, Qazaqstandaǵy AES qurylysy boiynsha referendýmda qazaqstandyqtardyń 71,12 paiyzy qoldap daýys berdi. Jalpy halyqtyń 63,66 paiyzy, iaǵni 7 820 204 adam, sailaýǵa qatysqan.
Referendýmnyń nátijesi elimizdiń energetikalyq qaýipsizdigin nyǵaitýǵa baǵyttalǵan mańyzdy sheshim boldy. Bul kórsetkishter Qazaqstan azamattarynyń atom energetikasyna degen kózqarasynyń oń ekenin jáne el damýy úshin mańyzdy jobany qoldaitynyn kórsetti.
Osylai, uzaq talqylaýdan keiingi naqty sheshimdi qoǵam bolyp qabyldadyq. Alda áli úlken jumystar kútýde.
