Memleket basshysy agroónerkásiptik keshen aldyna eńbek ónimdiligi men óńdelgen ónim eksportyn 5 jyl ishinde keminde 2,5 esege ulǵaıtý mindetin qoıǵan bolatyn. Qoıylǵan mindetterdi eskere otyryp, Úkimet bıylǵy jyldyń shilde aıynda Agroónerkásiptik keshendi damytýdyń 2021 jylǵa deıingi memlekettik baǵdarlamasyn ózektendirip, qaıta bekitti.
Selektorlyq otyrysta QR Aýyl sharýashylyǵynyń birinshi vıse-mınıstri A.Evnıev jańartylǵan memlekettik baǵdarlamanyń júzege asyrylýy týraly aıtyp berdi. Sondaı-aq, salalyq baǵdarlamalardyń qalaı júzege asyp jatqany týraly baıandady. Málimetterge sáıkes, shaǵyn jáne orta sharýa qojalyqtaryna negizdelgen etti mal sharýashylyǵyn damytýdyń salalyq baǵdarlamasy bıylǵy jyldyń ekinshi jartyjyldyǵynan bastap júzege asyrylýda. Bul úshin arnaıy jeńildetilgen «Sybaǵa» nesıelik ónimi iske qosylǵan.
Osy sekildi salalardaǵy jetistikter men aldaǵy josparlar týraly málimetterden soń Úkimet otyrysynda óńirlerdegi Memlekettik baǵdarlamanyń iske asyrylýy týraly Jambyl, Túrkistan, Aqmola, Batys Qazaqstan, Mańǵystaý oblystarynyń ákimderi baıandady.
Túrkistan oblysy boıynsha aqparat bergen oblys ákimi Janseıit Túımebaev alǵash ret salanyń 19 basym baǵyty (onyń ishinde: ósimdik sharýashylyǵy – 8, mal sharýashylyǵy – 7, qaıta óńdeý, eksportty ulǵaıtý – 4) qarastyrylǵan «Túrkistan oblysy agroónerkásip keshenin damytýdyń óńirlik baǵdarlamasy» ázirlenip, Aýyl sharýashylyǵy mınıstrligimen kelisilgenin jetkizdi. Nátıjesinde, etti mal sharýashylyǵyn damytý baǵytymen 1850 bas iri qara mal satyp alý josparlanyp, 11 aıdyń qorytyndysymen 2798 basqa ótinim tústi (1,5 ese). 1581 basy maquldanyp, nesıeleri berildi. Tuńǵysh ret oblysymyzda 6,5 myń tonna et Ózbekstan, Iran, Birikken Arab Ámirlikterine eksporttalyp, respýblıkalyq kórsetkishtiń 45,2 paıyzyn qamtydy. Et eksportyn odan ári ulǵaıtý maqsatynda jeltoqsan aıynda ónerkásiptik úlgidegi 10,0 myń bastyq mal bordaqylaý alańy iske qosyldy (Saıram aýdany «Nurym grýp» JSHS – qýattylyǵy 5,0 myń tonna, joba quny – 3,5 mlrd.tg.). 10 aıda 174,0 myń tonna et óndirilip, 6%-ǵa (2017 j. – 164,0 myń tn) artty.
– Sútti mal sharýashylyǵyn damytý baǵytymen 2025 jylǵa deıin 400 basqa deıingi 44 (qýattylyǵy - 10350 bas), 400 bastan joǵary 11 (qýatylyǵy – 4400 bas) taýarly sút fermasyn salý josparlanyp otyr. Jyl sońyna deıin «Qazyna jer LTD» JSHS-gimen qosymsha 500 basqa sút taýarly fermasy keńeıtiletin bolady. 10 aıda 604,5 myń tonna sút óndirilip, 3,2%-ǵa artty (2017 j.–585,6 myń tn). Sýarmaly jerlerdi damytý baǵytymen aǵymdaǵy jyly oblystyq búdjetten 1,3 mlrd.tg. qarjy qarastyrylyp, 29 nysanǵa aǵymdaǵy, 4 nysanǵa kúrdeli jóndeý jumystary júrgizildi. Nátıjesinde, 9,8 myń ga jerdiń sýmen qamtamasyz etilýi jaqsaryp, 3,3 myń ga qaıta aınalymǵa engizildi, – dedi J.Túımebaev.
Óz sózinde óńir basshysy Úkimet basshysynan Túrkistan oblysynda «Islam damý banki», «Evropa qaıta qurý jáne damý banki», «Halyqaralyq qaıta qurý jáne damý bankimen» birlesip iske asatyn aýqymdy jobalar bar ekenin, atalǵan jobalardyń merziminde iske asýyna qoldaý bildirýin surady.
Baıandamasynda ákim qarqyndy baý sharýashylyǵyn damytý baǵytymen 2025 jylǵa deıin qosymsha 22,5 myń ga-ǵa jemis-jıdek, júzim egý josparlanyp otyrǵanyn jetkizip, Agroónerkásip keshenin sıfrlandyrý baǵytymen 798,0 myń ga egistiktiń tolyǵymen elektrondy kartasy jasalynǵanyn, sonymen qatar, 2,9 mln. ga jaıylymnyń 26,3% sıfrlandyrylǵanyn málimdedi.
Jalpy, Túrkistan oblysynda Memlekettik baǵdarlamada kózdelgen ındıkatorlarǵa qol jetkizý maqsatynda ár aýyldyq okrýgten turatyn 15 aımaqtyq baǵdarlama ázirlenýde. Sonymen qatar, Mınıstrliktiń usynysyna sáıkes kózdelgen ındıkatorǵa qol jetkizbegen saıası jáne A korpýsy laýazymdarynyń jaýapkershiligin qaraý jóninde sharalar qabyldanýda. 2018 jylǵy 10 aıda aýyl sharýashylyǵynyń jalpy ónim kólemi 475,6 mlrd. teńgege jetip, naqty kólem ındeksi 103,4%-ǵa oryndaldy (jospar – 103,9). Bul kórsetkish respýblıkada 2-oryndy kórsetip otyr.
Máseleni qaraý qorytyndysyn shyǵara otyryp, QR Premer-mınıstri B.Saǵyntaev memlektetik baǵdarlamanyń kórsetkishteriniń ózgerýiniń oń dınamıkasyn atap ótti. Degenmen, birqatar oblystardyń kózdelgen nátıjelerden artta qalyp otyrǵanyn da aıtty. Osyǵan baılanysty, Aýyl sharýashylyǵy mınıstrligine ákimdiktermen birlesip jyl sońyna deıin barlyq maqsatty kórsetkishterge qol jetkizýdi jáne AÓK damýynyń negizgi kórsetkishteriniń oń dınamıkasyn qamtamasyz etý tapsyryldy.
Túrkistan oblysy ákiminiń baspasóz qyzmeti
