Shymkentte Muhtar Áýezov atyndaǵy Ońtústik Qazaqstan ýniversitetinde bolǵan qarjy jymqyrý isine qatysty alty adamǵa sot úkimi shyqty, dep habarlaidy Dalanews.kz.
Tergeý dereginshe, keltirilgen zalal kólemi – 129 million teńge. Qarajattyń bir bóligi ruqsatsyz jóndeý jumystaryna jáne avtokólik satyp alýǵa jumsalǵan.
Is materialdarynda birinshi prorektor N. eki ret tender ótkizbesten kelisimsharttarǵa qol qoiǵany aitylady. Sondai-aq bul iske laýazymdy tulǵalar men kásipkerler de tartylǵan.
Sot aiyptalýshylardyń jasaǵan áreketine ókingenin jáne keltirilgen zalaldy ótegenin eskerip, úkim shyǵardy:
-
Burynǵy prorektor 5 jyl bas bostandyǵynan aiyryldy
jáne memlekettik qyzmette ómir boiyna jumys isteýge tyiym salyndy; - Taǵy úsh adamǵa 5 jyl 7 aiǵa deiingi merzimde túrme jazasy;
- Eki adamǵa shartty jaza;
- Bir adamǵa 1 jylǵa bostandyǵyn shekteý jazasy taǵaiyndaldy.
Sot úkimi ázirge zańdy kúshine engen joq.
Eske salaiyq, buǵan deiin Soltústik Qazaqstan oblysy Taiynsha aýdanynda turǵyn úi-kommýnaldyq sharýashylyǵy bóliminiń basshysy 15,9 million teńge biýdjet qarjysyn jymqyrǵany úshin segiz jylǵa bas bostandyǵynan aiyrylǵan edi.
Sonymen qatar oǵan memlekettik qyzmette, sot júiesinde, Ulttyq bank pen kvazimemlekettik sektorda ómir boiy jumys isteýge tyiym salyndy. Bul týraly QR Bas prokýratýrasynyń baspasóz qyzmeti habarlady.
Prokýratýranyń málimetinshe, turǵyn úi-kommýnaldyq sharýashylyq bóliminde júrgizilgen tekseris barysynda biýdjet qarajatyn jymqyrý deregi anyqtalǵan. Naqty aitqanda, bólim basshysy áleýmettik mańyzy bar nysandardy jylýmen qamtamasyz etýge arnalǵan qural-jabdyqtardy satyp alý úshin jalǵan memlekettik satyp alý shartyn bir kózden taýar jetkizýshimen jasaǵan. Alaida kásipker bul kelisimsharttan beihabar bolǵan.
Atalǵan derek boiynsha 2024 jylǵy 6 shildede Qylmystyq kodekstiń 189-baby 4-bóligi 2-tarmaǵy (senip tapsyrylǵan múlikti iemdenip alý nemese ysyrap etý) boiynsha sotqa deiingi tergeý bastalǵan.
2025 jylǵy 30 maýsymda Taiynsha aýdandyq sotynyń úkimimen aiyptalýshy kináli dep tanylyp, segiz jylǵa bas bostandyǵynan aiyryldy. Sonymen qatar, ol endi memlekettik jáne kvazimemlekettik qurylymdarda, sot jáne qarjy júiesinde qyzmet ete almaidy.
