شىمكەنتتە مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىندە بولعان قارجى جىمقىرۋ ىسىنە قاتىستى التى ادامعا سوت ۇكىمى شىقتى، دەپ حابارلايدى Dalanews.kz.
تەرگەۋ دەرەگىنشە، كەلتىرىلگەن زالال كولەمى – 129 ميلليون تەڭگە. قاراجاتتىڭ ءبىر بولىگى رۇقساتسىز جوندەۋ جۇمىستارىنا جانە اۆتوكولىك ساتىپ الۋعا جۇمسالعان.
ءىس ماتەريالدارىندا ءبىرىنشى پرورەكتور ن. ەكى رەت تەندەر وتكىزبەستەن كەلىسىمشارتتارعا قول قويعانى ايتىلادى. سونداي-اق بۇل ىسكە لاۋازىمدى تۇلعالار مەن كاسىپكەرلەر دە تارتىلعان.
سوت ايىپتالۋشىلاردىڭ جاساعان ارەكەتىنە وكىنگەنىن جانە كەلتىرىلگەن زالالدى وتەگەنىن ەسكەرىپ، ۇكىم شىعاردى:
-
بۇرىنعى پرورەكتور 5 جىل باس بوستاندىعىنان ايىرىلدى
جانە مەملەكەتتىك قىزمەتتە ءومىر بويىنا جۇمىس ىستەۋگە تىيىم سالىندى؛ - تاعى ءۇش ادامعا 5 جىل 7 ايعا دەيىنگى مەرزىمدە تۇرمە جازاسى؛
- ەكى ادامعا شارتتى جازا؛
- ءبىر ادامعا 1 جىلعا بوستاندىعىن شەكتەۋ جازاسى تاعايىندالدى.
سوت ۇكىمى ازىرگە زاڭدى كۇشىنە ەنگەن جوق.
ەسكە سالايىق، بۇعان دەيىن سولتۇستىك قازاقستان وبلىسى تايىنشا اۋدانىندا تۇرعىن ۇي-كوممۋنالدىق شارۋاشىلىعى ءبولىمىنىڭ باسشىسى 15،9 ميلليون تەڭگە بيۋدجەت قارجىسىن جىمقىرعانى ءۇشىن سەگىز جىلعا باس بوستاندىعىنان ايىرىلعان ەدى.
سونىمەن قاتار وعان مەملەكەتتىك قىزمەتتە، سوت جۇيەسىندە، ۇلتتىق بانك پەن كۆازيمەملەكەتتىك سەكتوردا ءومىر بويى جۇمىس ىستەۋگە تىيىم سالىندى. بۇل تۋرالى ق ر باس پروكۋراتۋراسىنىڭ باسپا ءسوز قىزمەتى حابارلادى.
پروكۋراتۋرانىڭ مالىمەتىنشە، تۇرعىن ۇي-كوممۋنالدىق شارۋاشىلىق بولىمىندە جۇرگىزىلگەن تەكسەرىس بارىسىندا بيۋدجەت قاراجاتىن جىمقىرۋ دەرەگى انىقتالعان. ناقتى ايتقاندا، ءبولىم باسشىسى الەۋمەتتىك ماڭىزى بار نىسانداردى جىلۋمەن قامتاماسىز ەتۋگە ارنالعان قۇرال-جابدىقتاردى ساتىپ الۋ ءۇشىن جالعان مەملەكەتتىك ساتىپ الۋ شارتىن ءبىر كوزدەن تاۋار جەتكىزۋشىمەن جاساعان. الايدا كاسىپكەر بۇل كەلىسىمشارتتان بەيحابار بولعان.
اتالعان دەرەك بويىنشا 2024 جىلعى 6 شىلدەدە قىلمىستىق كودەكستىڭ 189-بابى 4-بولىگى 2-تارماعى (سەنىپ تاپسىرىلعان مۇلىكتى يەمدەنىپ الۋ نەمەسە ىسىراپ ەتۋ) بويىنشا سوتقا دەيىنگى تەرگەۋ باستالعان.
2025 جىلعى 30 ماۋسىمدا تايىنشا اۋداندىق سوتىنىڭ ۇكىمىمەن ايىپتالۋشى كىنالى دەپ تانىلىپ، سەگىز جىلعا باس بوستاندىعىنان ايىرىلدى. سونىمەن قاتار، ول ەندى مەملەكەتتىك جانە كۆازيمەملەكەتتىك قۇرىلىمداردا، سوت جانە قارجى جۇيەسىندە قىزمەت ەتە المايدى.
