Ulttyq Bank tóraǵasy Timýr Súleimenov 2025 jylǵy 19 maýsymda Senattyń dálizinde jýrnalisterge bergen suqbatynda Qazaqstannyń barlyq bankterin QR-kodtyń biryńǵai júiesine qosý protsesiniń qai kezeńge kelgenin aitty. Ol bul arada Ulttyq banktiń enshiles uiymy - Ulttyq tólem korporatsiiasy biryńǵai operator bolyp tabylatynyn naqtylady, dep habarlaidy Dalanews.kz.
"Qazir bul júie arqyly barlyq qolma-qol aqshasyz tólemderdiń 90%-y ótedi. Mysaly, kúnine 5,9 trln teńge óńdeledi. Iaǵni, bul - úlken uiym. Ol jalpyulttyq QR operatory bolady. Qazir oǵan úsh bank ótti, menińshe, toǵyz bank test rejiminde jumys istep jatyr", - dedi Timýr Súleimenov.
Onyń aitýynsha, jyl sońyna deiin barlyq bankterdi osy júiege qosý josparlanyp otyr: standartty seriktestik tetikter nemese zańnamalyq ózgerister arqyly.
"Sonymen qatar biz Parlament arqyly barlyq bankterdiń jańa ǵana sipattaǵan júiege mindetti túrde qatysýyna baǵyttalǵan birqatar zańnamalyq túzetýlerdi engizý jaiyn qarastyryp jatyrmyz. Biz parallel joldarmen qatar jaǵdaidy baqylap otyramyz. Bankter bul jaiynan tolyqtai habardar. Bul arada munyń úlken tehnologiialyq protsess ekenin durys túsingen jón", - dedi QR Ulttyq Banktiń tóraǵasy.
Ol ár banktiń ózindik tehnikalyq arhitektýrasy bar ekenin jáne barlyǵy ózderiniń ekojúielerin damytýǵa umtylatynyn atap ótti.
"Biryńǵai ortalyqqa, biryńǵai operatorǵa qosylýdy qamtamasyz etý qajet. Bul qosymsha aqsha, adami resýrstar, qarjylyq, tehnologiialyq resýrstardy qajet etedi. Sondyqtan ony "dál qazir, birden jasa" dep biz eshkimge buiyra almaimyz. Biraq biz bul sharanyń qajet ekenin jaqsylap túsindirýdemiz. Banktermen bolǵan kezdesýlerde de biz únemi bul taqyrypty kóterip otyramyz: "Qashan? Qashan? Qashan?" dep. Iaǵni, bul máselemen men de, meniń orynbasarlarym da, tehnikalyq komandalarymyz da ainalysýda", – dep sózin tolyqtyrdy Timýr Súleimenov.
Aita ketsek, 2025 jyly aqpan aiynda Ulttyq Bank tóraǵasy Timýr Súleimenov barlyq bankter úshin biryńǵai QR kod jumys istei bastaitynyn málimdegen. Alaida bankterge biryńǵai QR-kodty engizý kúrdeli protsess ekeni belgili boldy. Jalpy, bul tutynýshylar úshin óte qolaily jaǵdai týǵyzady. Máselen, Siz qai banktiń klienti bolsańyz da, kez kelgen terminal arqyly tólem jasai beresiz.
