ۇلتتىق بانك ءتوراعاسى تيمۋر سۇلەيمەنوۆ 2025 جىلعى 19 ماۋسىمدا سەناتتىڭ دالىزىندە جۋرناليستەرگە بەرگەن سۇقباتىندا قازاقستاننىڭ بارلىق بانكتەرىن QR-كودتىڭ ءبىرىڭعاي جۇيەسىنە قوسۋ پروسەسىنىڭ قاي كەزەڭگە كەلگەنىن ايتتى. ول بۇل ارادا ۇلتتىق بانكتىڭ ەنشىلەس ۇيىمى - ۇلتتىق تولەم كورپوراسياسى ءبىرىڭعاي وپەراتور بولىپ تابىلاتىنىن ناقتىلادى، دەپ حابارلايدى Dalanews.kz.
"ءقازىر بۇل جۇيە ارقىلى بارلىق قولما-قول اقشاسىز تولەمدەردىڭ 90%-ى وتەدى. مىسالى، كۇنىنە 5،9 ترلن تەڭگە وڭدەلەدى. ياعني، بۇل - ۇلكەن ۇيىم. ول جالپىۇلتتىق QR وپەراتورى بولادى. ءقازىر وعان ءۇش بانك ءوتتى، مەنىڭشە، توعىز بانك تەست رەجيمىندە جۇمىس ىستەپ جاتىر"، - دەدى تيمۋر سۇلەيمەنوۆ.
ونىڭ ايتۋىنشا، جىل سوڭىنا دەيىن بارلىق بانكتەردى وسى جۇيەگە قوسۋ جوسپارلانىپ وتىر: ستاندارتتى سەرىكتەستىك تەتىكتەر نەمەسە زاڭنامالىق وزگەرىستەر ارقىلى.
"سونىمەن قاتار ءبىز پارلامەنت ارقىلى بارلىق بانكتەردىڭ جاڭا عانا سيپاتتاعان جۇيەگە مىندەتتى تۇردە قاتىسۋىنا باعىتتالعان ءبىرقاتار زاڭنامالىق تۇزەتۋلەردى ەنگىزۋ جايىن قاراستىرىپ جاتىرمىز. ءبىز پاراللەل جولدارمەن قاتار جاعدايدى باقىلاپ وتىرامىز. بانكتەر بۇل جايىنان تولىقتاي حاباردار. بۇل ارادا مۇنىڭ ۇلكەن تەحنولوگيالىق پروسەسس ەكەنىن دۇرىس تۇسىنگەن ءجون"، - دەدى ق ر ۇلتتىق بانكتىڭ ءتوراعاسى.
ول ءار بانكتىڭ وزىندىك تەحنيكالىق ارحيتەكتۋراسى بار ەكەنىن جانە بارلىعى وزدەرىنىڭ ەكوجۇيەلەرىن دامىتۋعا ۇمتىلاتىنىن اتاپ ءوتتى.
"ءبىرىڭعاي ورتالىققا، ءبىرىڭعاي وپەراتورعا قوسىلۋدى قامتاماسىز ەتۋ قاجەت. بۇل قوسىمشا اقشا، ادامي رەسۋرستار، قارجىلىق، تەحنولوگيالىق رەسۋرستاردى قاجەت ەتەدى. سوندىقتان ونى "ءدال ءقازىر، بىردەن جاسا" دەپ ءبىز ەشكىمگە بۇيىرا المايمىز. ءبىراق ءبىز بۇل شارانىڭ قاجەت ەكەنىن جاقسىلاپ تۇسىندىرۋدەمىز. بانكتەرمەن بولعان كەزدەسۋلەردە دە ءبىز ۇنەمى بۇل تاقىرىپتى كوتەرىپ وتىرامىز: "قاشان؟ قاشان؟ قاشان؟" دەپ. ياعني، بۇل ماسەلەمەن مەن دە، مەنىڭ ورىنباسارلارىم دا، تەحنيكالىق كوماندالارىمىز دا اينالىسۋدا"، – دەپ ءسوزىن تولىقتىردى تيمۋر سۇلەيمەنوۆ.
ايتا كەتسەك، 2025 جىلى اقپان ايىندا ۇلتتىق بانك ءتوراعاسى تيمۋر سۇلەيمەنوۆ بارلىق بانكتەر ءۇشىن ءبىرىڭعاي QR كود جۇمىس ىستەي باستايتىنىن مالىمدەگەن. الايدا بانكتەرگە ءبىرىڭعاي QR-كودتى ەنگىزۋ كۇردەلى پروسەسس ەكەنى بەلگىلى بولدى. جالپى، بۇل تۇتىنۋشىلار ءۇشىن وتە قولايلى جاعداي تۋعىزادى. ماسەلەن، ءسىز قاي بانكتىڭ كليەنتى بولساڭىز دا، كەز كەلگەن تەرمينال ارقىلى تولەم جاساي بەرەسىز.
