Qorǵanys mınıstrligine qaraıtyn Aqtaý garnızonynda kelisimshart boıynsha qyzmet etetin 39 jastaǵy áskerı qyzmetshi ózine qol jumsady, dep habarlaıdy Dalanews.kz.

Oqıǵa 28 qyrkúıekte bolǵan.

“Aqtaý garnızonyndaǵy áskerı bólimderdiń birinde kelisimshart boıynsha qyzmet etetin 1985 jylǵy áskerı qyzmetshiniń denesi tabyldy. Áskerı qyzmetshi bir jylǵa jýyq ýaqyt dekrettik demalysta bolǵan. Aldyn ala aqparat boıynsha áskerı qyzmetshiniń ózine qol jumsaýyna otbasylyq-turmystyq janjal sebep bolǵan. Oqıǵanyń sebepteri anyqtalyp jatyr”, - dep málimdedi Aqtaý garnızonynyń baspasóz qyzmeti.

Osy fakti boıynsha qylmystyq is qozǵalǵan.

Áýe qorǵanysy kúshteriniń qolbasshylyǵy marqumnyń týystary men jaqyndaryna kóńil aıtty.

Eske salaıyq, qyrkúıek aıynda birneshe qaıǵyly oqıǵa oryn aldy.

Máselen, 7 qyrkúıekte Mańǵystaý oblysynda áskerı oqý-jattyǵýlar kezinde merzimdi qyzmettegi sarbazdyń betine oq tıip, aýrýhanaǵa jetpeı kóz jumǵan edi.Adam ólimi boıynsha qylmystyq is qozǵaldy. Tergeý múddesine baılanysty basqa aqparat jarıalanbady. 

Qaıtys bolǵan sarbazdyń ákesi Qorǵanys mınıstrine beıneúndeý joldady. Keıinnen Qorǵanys mınıstrligi kináliler qatań jaýapkershilikke tartylatynyn málimdedi.

16 qyrkúıekte Qazaqstannyń ońtústigindegi Arys garnızonynda áskerı bólimderdiń birinde kelisimshart boıynsha qyzmet etetin áskerı qyzmetshi basynan travmatıkalyq qarýdan jaraqat aldy.

19 qyrkúıekte Aıagózde áskerı qyzmetshiniń denesi tabyldy. Garnızonnyń aldyn ala aqparaty boıynsha, ofıser óz-ózine qol jumsaǵan.

Al Almatyda UQK Shekara akademıasynyń kýrsanty qaıtys boldy.