Qasym-Jomart Toqaevtyń pikirinshe, eń aldymen, qazaq tiliniń qoldanys aiasyn arttyrýǵa baǵyttalǵan praktikalyq jumystarǵa basymdyq bergen jón. Onyń ishinde bilim berý isindegi, tehnologiiadaǵy jáne media salasyndaǵy qazaqsha kontent pen tsifrlyq ónimderdi ázirleýge airyqsha mán berý qajet.
Sondai-aq Prezident balalarǵa arnalǵan animatsiialyq týyndylar shyǵarýdyń, kópshilikke arnalǵan kino ónimderi men ǵylymi-tanymdyq ádebietter qoryn molaitýdyń, áleýmettik jelilerde aǵartýshylyq baǵyttaǵy arnalar ashýdyń mańyzdylyǵyna nazar aýdardy.
Oǵan qosa ǵalamdyq tsifrlyq platformalardy qazaqshalap, til úirenýge múmkindik beretin otandyq aqparattyq júielerdi kóbeitý qajettigin atap kórsetti.
Sonymen qatar Prezident ártúrli áleýmettik toptardyń, onyń ishinde jastardyń arasynda til tazalyǵyn saqtaý úshin oqý jáne jazý saýattylyǵyn arttyrýǵa arnalǵan sharalardyń qajettiligine erekshe toqtaldy.
Búgingi tańda Aqparat jáne mádeniet ministrligi daiyndaǵan “Onlain platformalar jáne onlain jarnamalar” týraly Zańǵa sáikes onlain-platformalarda paidalanýshy qazaq tilinde interfeisti paidalana alýy kerek. Iaǵni onlain-platformanyń menshik iesi kontenttiń qazaq tiline avtomatty túrde aýdarylýyna múmkindik jasaidy jáne kontentti qazaq tilinde moderatsiialaýdy qamtamasyz etedi.
Qazirgi tańda basty aqparat kózi ǵalamtor jelisinen alynatynyn eskersek, óskeleń urpaq úshin qazaq tilindegi kontentti meiilinshe kóbeitý mańyzdy. Ásirese qazaqsha kino men animatsiianyń úlesin arttyrý qajet.
Qazbek Maigeldinov, saiasattanýshy
