قاسىم-جومارت توقايەۆتىڭ پىكىرىنشە، ەڭ الدىمەن، قازاق ءتىلىنىڭ قولدانىس اياسىن ارتتىرۋعا باعىتتالعان پراكتيكالىق جۇمىستارعا باسىمدىق بەرگەن ءجون. ونىڭ ىشىندە ءبىلىم بەرۋ ىسىندەگى، تەحنولوگياداعى جانە مەديا سالاسىنداعى قازاقشا كونتەنت پەن سيفرلىق ونىمدەردى ازىرلەۋگە ايرىقشا ءمان بەرۋ قاجەت.
سونداي-اق پرەزيدەنت بالالارعا ارنالعان انيماسيالىق تۋىندىلار شىعارۋدىڭ، كوپشىلىككە ارنالعان كينو ونىمدەرى مەن عىلىمي-تانىمدىق ادەبيەتتەر قورىن مولايتۋدىڭ، الەۋمەتتىك جەلىلەردە اعارتۋشىلىق باعىتتاعى ارنالار اشۋدىڭ ماڭىزدىلىعىنا نازار اۋداردى.
وعان قوسا عالامدىق سيفرلىق پلاتفورمالاردى قازاقشالاپ، ءتىل ۇيرەنۋگە مۇمكىندىك بەرەتىن وتاندىق اقپاراتتىق جۇيەلەردى كوبەيتۋ قاجەتتىگىن اتاپ كورسەتتى.
سونىمەن قاتار پرەزيدەنت ءارتۇرلى الەۋمەتتىك توپتاردىڭ، ونىڭ ىشىندە جاستاردىڭ اراسىندا ءتىل تازالىعىن ساقتاۋ ءۇشىن وقۋ جانە جازۋ ساۋاتتىلىعىن ارتتىرۋعا ارنالعان شارالاردىڭ قاجەتتىلىگىنە ەرەكشە توقتالدى.
بۇگىنگى تاڭدا اقپارات جانە مادەنيەت مينيسترلىگى دايىنداعان “ونلاين پلاتفورمالار جانە ونلاين جارنامالار” تۋرالى زاڭعا سايكەس ونلاين-پلاتفورمالاردا پايدالانۋشى قازاق تىلىندە ينتەرفەيستى پايدالانا الۋى كەرەك. ياعني ونلاين-پلاتفورمانىڭ مەنشىك يەسى كونتەنتتىڭ قازاق تىلىنە اۆتوماتتى تۇردە اۋدارىلۋىنا مۇمكىندىك جاسايدى جانە كونتەنتتى قازاق تىلىندە مودەراسيالاۋدى قامتاماسىز ەتەدى.
قازىرگى تاڭدا باستى اقپارات كوزى عالامتور جەلىسىنەن الىناتىنىن ەسكەرسەك، وسكەلەڭ ۇرپاق ءۇشىن قازاق تىلىندەگى كونتەنتتى مەيىلىنشە كوبەيتۋ ماڭىزدى. اسىرەسە قازاقشا كينو مەن انيماسيانىڭ ۇلەسىن ارتتىرۋ قاجەت.
قازبەك مايگەلدينوۆ، ساياساتتانۋشى
