Aqsha jınaǵynyń tıimdi bir túri – banktegi depozıtter. Elimizdegi ekinshi deńgeıdegi bankter bul rette tutynýshynyń aqshasyn jınaqtap, saqtap qana qoımaı, jylyna ústinen azdap ta bolsa tabys kórýge múmkindik beredi. Búgingi tańda elimizdegi bankter arasynda, mine osyndaı ýáde etiletin jyldyq tıimdi syıaqy mólsherlemesi (JTSM) eń joǵarysy Freedom Bank-ke tıesili, dep habarlaıdy Dalanews.kz.
"2025 jylǵy 19 mamyrdan bastap Frıdom Qazaqstan Banki jeke tulǵalardyń teńge túrindegi salymdary boıynsha jyldyq paıyzdyq mólsherlemelerdi jańartady. Endi qazaqstandyqtar jyldyq 18,5% syıaqy mólsherlemesimen aqshasyn osy bankte saqtaı alady", delingen banktiń resmı baspasóz habarlamasynda.
Atap aıtqanda, bul ózgeris "Strategıa" jáne "Kapıtal"depozıtterin qamtıdy.
"Strategıa" depozıti:
- Merzimi: 6 aı.
- Nomınaldy mólsherleme: 15,5%
- JTSM: 16,5%
"Kapıtal" depozıti:
- Merzimi 3 aı – 15,9% (JTSM - 17,0%)
- Merzimi 6 aı – 17,2% (JTSM - 18,5%)
- Merzimi 24 aı – 10,75% (JTSM - 11,3%).
"Biz klıentterge aqsha jınaqtaýdyń tıimdi quraldaryn usynýǵa tyrysamyz. Stavkalardy kóterý -bul halyqtyń qarjylyq turaqtylyǵyn qoldaý jónindegi strategıamyzdyń bir bóligi", dep túsinikteme beredi banktiń baspasóz qyzmeti atalǵan ózgeris boıynsha.
Aıta ketsek, 14 mamyrdan bastap Evrazıalyq bank te óz mólsherlemelerin kóterdi. Atap aıtqanda, tolyqtyrý quqyǵynsyz teńge túrindegi "TURBO Depozıt Nakopıtelnyıda" ózgeris boldy :
- Merzimi 3 aı 17,3%-dan 18% syıaqy mólsherlemesimen;
- Merzimi 6 aıǵa deıin 10 mln teńgeden bastap: 18,1%-den 18,2%-ǵa deıin.
Bul bank depozıtter boıynsha syıaqy mólsherlemesin taıaýda ǵana, ıaǵnı 1 mamyrda kótergen bolatyn.
Sol sekildi 9 mamyrdan bastap Home Credit Bank tolyqtyrý múmkindigi men merziminen buryn aqshany sheshý alý qarastyrylatyn "Prostoı" jáne "Pochtovyı" depozıtteriniń jyldyq syıaqy mólsherlemelerin 0,5%-ǵa arttyrdy. Biraq bank 3 aı merzimdi qamtıtyn "Prostoı" depozıti boıynsha salym qabyldaýdy toqtatqan edi.
Buǵan deıin saıtymyzda "Qazaqstandaǵy eń baı adam – Turlov Tramptan da aýqatty bolyp shyqty" degen materıal jarıalanǵan bolatyn.
