اقشا جيناعىنىڭ ءتيىمدى ءبىر ءتۇرى – بانكتەگى دەپوزيتتەر. ەلىمىزدەگى ەكىنشى دەڭگەيدەگى بانكتەر بۇل رەتتە تۇتىنۋشىنىڭ اقشاسىن جيناقتاپ، ساقتاپ قانا قويماي، جىلىنا ۇستىنەن ازداپ تا بولسا تابىس كورۋگە مۇمكىندىك بەرەدى. بۇگىنگى تاڭدا ەلىمىزدەگى بانكتەر اراسىندا، مىنە وسىنداي ۋادە ەتىلەتىن جىلدىق ءتيىمدى سىياقى مولشەرلەمەسى (جتسم) ەڭ جوعارىسى Freedom Bank-كە تيەسىلى، دەپ حابارلايدى Dalanews.kz.
"2025 جىلعى 19 مامىردان باستاپ فريدوم قازاقستان بانكى جەكە تۇلعالاردىڭ تەڭگە تۇرىندەگى سالىمدارى بويىنشا جىلدىق پايىزدىق مولشەرلەمەلەردى جاڭارتادى. ەندى قازاقستاندىقتار جىلدىق 18،5% سىياقى مولشەرلەمەسىمەن اقشاسىن وسى بانكتە ساقتاي الادى"، دەلىنگەن بانكتىڭ رەسمي باسپا ءسوز حابارلاماسىندا.
اتاپ ايتقاندا، بۇل وزگەرىس "ستراتەگيا" جانە "كاپيتال"دەپوزيتتەرىن قامتيدى.
"ستراتەگيا" دەپوزيتى:
- مەرزىمى: 6 اي.
- نومينالدى مولشەرلەمە: 15،5%
- جتسم: 16،5%
"كاپيتال" دەپوزيتى:
- مەرزىمى 3 اي – 15،9% (جتسم - 17،0%)
- مەرزىمى 6 اي – 17،2% (جتسم - 18،5%)
- مەرزىمى 24 اي – 10،75% (جتسم - 11،3%).
"ءبىز كليەنتتەرگە اقشا جيناقتاۋدىڭ ءتيىمدى قۇرالدارىن ۇسىنۋعا تىرىسامىز. ستاۆكالاردى كوتەرۋ -بۇل حالىقتىڭ قارجىلىق تۇراقتىلىعىن قولداۋ جونىندەگى ستراتەگيامىزدىڭ ءبىر بولىگى"، دەپ تۇسىنىكتەمە بەرەدى بانكتىڭ باسپا ءسوز قىزمەتى اتالعان وزگەرىس بويىنشا.
ايتا كەتسەك، 14 مامىردان باستاپ ەۆرازيالىق بانك تە ءوز مولشەرلەمەلەرىن كوتەردى. اتاپ ايتقاندا، تولىقتىرۋ قۇقىعىنسىز تەڭگە تۇرىندەگى "TURBO دەپوزيت ناكوپيتەلنىيدا" وزگەرىس بولدى :
- مەرزىمى 3 اي 17،3%-دان 18% سىياقى مولشەرلەمەسىمەن؛
- مەرزىمى 6 ايعا دەيىن 10 ملن تەڭگەدەن باستاپ: 18،1%-دەن 18،2%-عا دەيىن.
بۇل بانك دەپوزيتتەر بويىنشا سىياقى مولشەرلەمەسىن تاياۋدا عانا، ياعني 1 مامىردا كوتەرگەن بولاتىن.
سول سەكىلدى 9 مامىردان باستاپ Home Credit Bank تولىقتىرۋ مۇمكىندىگى مەن مەرزىمىنەن بۇرىن اقشانى شەشۋ الۋ قاراستىرىلاتىن "پروستوي" (جتسم -15،5%) جانە "پوچتوۆىي" (جتسم - 15%) دەپوزيتتەرىنىڭ جىلدىق سىياقى مولشەرلەمەلەرىن 0،5%-عا ارتتىردى. ءبىراق بانك 3 اي مەرزىمدى قامتيتىن "پروستوي" دەپوزيتى بويىنشا سالىم قابىلداۋدى توقتاتقان ەدى. ال كەم دەگەندە 100 مىڭ تەڭگە سالۋدى تالاپ ەتەتىن "سبەرەگاتەلنىي حوۋم" دەپوزيتى بويىنشا جىلدىق ءتيىمدى سىياقى مولشەرلەمەسى 17-18،5% ارالىعىن قامتيدى.
بۇعان دەيىن سايتىمىزدا "قازاقستانداعى ەڭ باي ادام – تۇرلوۆ ترامپتان دا اۋقاتتى بولىپ شىقتى" دەگەن ماتەريال جاريالانعان بولاتىن.
