Sý jáne ırrıgasıa mınıstrligine qarasty baseındik ınspeksıalar el aýmaǵyndaǵy 1502 gıdrotehnıkalyq qurylysqa jan-jaqty tekseris júrgizdi, dep habarlaıdy Dalanews.kz.

Sý resýrstaryn retteý, qorǵaý jáne paıdalaný komıteti tóraǵasynyń mindetin atqarýshy Gúlmıra Imashevanyń sózinshe, tekseris nátıjesinde anyqtalǵan olqylyqtardy joıýǵa qatysty qurylys ıelerine arnaıy usynystar ázirlendi.

"Barlyq sý qoımasy belgilengen josparǵa sáıkes jumys isteıdi, al kóktemgi sý tasqynyna baılanysty bul keste túzetilip otyrady. Qar sýynyń kólemin basqarý maqsatynda soltústik, shyǵys, ortalyq jáne batys óńirlerdegi sý qoımalarynan artyq sý aǵyzyldy. Al ońtústik aımaqtarda sý qoımalarynyń jumysy sý jınaý rejıminde jalǵasýda", – dep málimdedi ol. 

Aıta ketsek, Qazaqstanda 8 baseındik ınspeksıa bar. Olar: Aral-Syrdarıa, Balqash-Alakól, Ertis, Esil, Jaıyq-Kaspıı, Nura-Sarysý, Tobyl-Torǵaı jáne Shý-Talas baseınderi.